Ціханоўская: Паспрабуем пераканаць Сейм Літвы, што ў прапанаваным выглядзе папраўкі аб пазбаўленні беларусаў ВНЖ прымаць не трэба

9 красавіка, Позірк. Святлана Ціханоўская заклікала суайчыннікаў, якія атрымалі від на жыхарства ў Літве, не наведваць Беларусь, “калі гэта пагражае небяспекай”, аднак падкрэсліла, што важна ізаляваць рэжым Лукашэнкі, а не беларусаў.

Пра гэта дэмакратычны лідар заявіла 9 красавіка, каментуючы зарэгістраваныя ў Сейме Літвы папраўкі, якія прапануюць увесці новыя падставы для анулявання ВНЖ беларусаў у гэтай балтыйскай краіне.

“На гэты момант гэта не новы закон, а толькі прапанова, — цытуе Ціханоўскую яе прэс-служба. — Мы на сувязі з дэпутатамі Сейма і паспрабуем іх пераканаць, што ў такім выглядзе папраўкі не павінны быць прынятыя”.

Пры гэтым дэмлідар перасцерагла беларусаў — уладальнікаў “гуманітарнай візы або палітычнага прытулку” — ад наведвання Беларусі. “Бо гэта не толькі сігнал для рэжыму звярнуць на вас павышаную ўвагу, але і падстава для дзяржаўных органаў Літвы ануляваць дазвол на часовае знаходжанне. Паколькі вы паказалі падставай для яго выдачы немагчымасць вярнуцца ў сваю краіну”, — удакладніла палітык.

“Не трэба ездзіць у Беларусь, калі гэта пагражае небяспекай! — дадала яна. — Добрыя намеры не вартыя таго, каб апынуцца за кратамі. Абмен дакументаў або здзелкі з нерухомасцю не зробяць вас шчаслівымі, калі не будзе магчымасці ўсім гэтым скарыстацца”.

На думку Ціханоўскай, “людзі, якія ўцяклі ад палітычнага пераследу, і так не могуць вярнуцца дадому, каб дапамагчы блізкім, наведаць пахаванне сваякоў або паказаць дзецям родныя мясціны”. “А тыя, хто могуць перасякаць мяжу без страху апынуцца ў турме, робяць гэта не праз любоў да Лукашэнкі або падтрымку вайсковай агрэсіі супраць Украіны, а з асабістых прычын”, — сказала яна.

Дэмлідар адзначыла, што “рэжым таксама імкнецца пасварыць беларусаў і літоўцаў”.

“Як і Літва, мы зацікаўленыя выяўляць правакатараў і захоўваць добразычлівыя адносіны паміж людзьмі. Бо ў будучыні мы бачым на заходняй мяжы не высокую сцяну, а адкрытыя дзверы — з Еўропай у якасці добрага партнёра”, — падсумавала Ціханоўская.

9 красавіка ў Сейме Літвы былі зарэгістраваныя папраўкі да закона Літоўскай Рэспублікі аб абмежавальных мерах адносна ваеннай агрэсіі супраць Украіны XIV-1888, якія, у выпадку прыняцця, прывядуць да анулявання дазволаў на часовае пражыванне, выдадзенага грамадзянам Расіі і Беларусі, калі яны выязджаюць у свае краіны “больш за адзін раз на месяц на працягу апошніх 12 месяцаў”.

Аўтары паправак у абгрунтаванні, апроч іншага, паказваюць, што “абсалютная большасць беларусаў, якія маюць часовы від на жыхарства ў Літве, больш-менш рэгулярна вяртаюцца ў Беларусь”.

“Сярод іх ёсць тыя, хто мае дазвол на часовае пражыванне, выдадзенае па гуманітарных меркаваннях. Тысячы такіх выпадкаў былі зафіксаваныя ў снежні мінулага года <…>. Аднак іх там могуць завербаваць, папрасіць выканаць пэўныя выведвальныя функцыі і г.д.”, — сцвярджаецца ў абгрунтаванні да праекту.

Акрамя гэтага, аўтары прапануюць ануляваць дазволы на часовае пражыванне ў Літве грамадзян Расіі і Беларусі за публічнае адабрэнне злачынства расійскай агрэсіі супраць Украіны, а таксама калі яны “наўмысна і сістэматычна публічна распаўсюджваюць ілжывую інфармацыю, якая супярэчыць інтарэсам грамадства або дзяржавы”.

Аб прапанове пазбаўляць віду на жыхарства расіян і беларусаў, якія часцей, чым раз на месяц, ездзяць на радзіму, 14 лютага заявіў кіраўнік Камітэта нацыянальнай бяспекі і абароны Сейма Лаўрынас Кашчунас, які 25 сакавіка быў прызначаны міністрам абароны Літвы.

12 лютага стала вядома, што Сейм перанёс на вясновую сесію разгляд законапраекта аб падаўжэнні абмежаванняў у дачыненні да грамадзян Беларусі і Расіі, тэрмін дзеяння якіх заканчваецца 2 траўня 2024 года.

Праект закона прадугледжвае дадатковыя праверкі грамадзян Беларусі на мяжы з Літвой.

Законапраект прадугледжвае выключэнні для членаў сем’яў грамадзян Літвы, дзяржаў ЕС, Еўрапейскай эканамічнай зоны і Швейцарыі; членаў экіпажаў, якія ажыццяўляюць міжнародныя грузавыя і пасажырскія перавозкі; асоб, якія прыбываюць у Літву па гуманітарных прычынах, і членаў сем’яў такіх асоб; дыпламатаў і іншых асоб, якія карыстаюцца імунітэтам і прывілеямі ў адпаведнасці з міжнароднымі канвенцыямі.