Азербайджанец на грузінскім грузавіку спрабаваў завезці ў Польшчу беларускія цыгарэты, схаваныя ў пятрушцы

27 лістапада, Позірк. Амаль 50 тыс. кантрабандных цыгарэт з беларускімі акцызнымі маркамі выявілі супрацоўнікі Падляскага ўпраўлення Нацыянальнай падатковай адміністрацыі (НПА) Польшчы пры праверцы на польска-літоўскай мяжы грузінскага грузавога аўтамабіля, які перавозіў зеляніну пятрушкі.

Паводле інфармацыі НПА, цыгарэты былі выяўленыя пры дапамозе рэнтгенаўскага сканера “ў спецыяльна падрыхтаваных драўляных падставах скрынь з зелянінай“, а ў правядзенні кантролю ўдзельнічала бельгійская аўчарка, навучаная пошуку тытунёвых вырабаў.

Арыентоўны рынкавы кошт канфіскаванай кантрабанды складае больш за 850 тыс. злотых (больш за 232 тыс. долараў).

Кіроўцу грузавога аўтамабіля, 40-гадоваму грамадзяніну Азербайджана, выстаўленыя абвінавачванні ў адпаведнасці з Фіскальным крымінальным кодэксам Польшчы. Паведамляецца, што яму пагражае штраф альбо пазбаўленне волі на тэрмін да пяці гадоў.