Савет ЕС зацвердзіў увядзенне крымінальнай адказнасці за парушэнне санкцый

12 красавіка, Позірк. Савет Еўрапейскага саюза зацвердзіў 12 красавіка мінімальныя правілы пераследу за парушэнне або абыход санкцый ЕС у дзяржавах-членах.

У адпаведнасці з дырэктывай, дапамога ў абыходзе забароны на паездкі ў краіны ЕС, гандаль санкцыйнымі таварамі або ажыццяўленне забароненай фінансавай дзейнасці, а таксама дапамога і падбухторванне да гэтых злачынстваў могуць быць крымінальна каральныя.

У паведамленні Савета ЕС зазначаецца, што “дзяржавы-члены павінны забяспечыць, каб парушэнне санкцый каралася эфектыўнымі і суразмернымі крымінальнымі пакараннямі, якія вар’іруюцца ў залежнасці ад правапарушэння”.

Пры гэтым наўмыснае парушэнне санкцый павінна цягнуць за сабой турэмнае зняволенне ў якасці максімальнага пакарання. На асоб, якія парушылі абмежавальныя меры ЕС, могуць быць накладзены дадатковыя штрафы.

Юрыдычныя асобы, гаворыцца ў рэлізе, таксама могуць быць прыцягнуты да адказнасці, калі правапарушэнне здзейснена асобай, якая займае кіруючую пасаду ў арганізацыі. У такіх выпадках санкцыі могуць уключаць у сябе пазбаўленне права займацца прадпрымальніцкай дзейнасцю і адкліканне дазволаў на вядзенне гаспадарчай дзейнасці.

Адзначаецца, што дырэктыва набудзе моц на дваццаты дзень пасля публікацыі ў Афіцыйным часопісе ЕС, пасля чаго ў дзяржаў-членаў будзе 12 месяцаў на ўключэнне палажэнняў дакумента ў сваё нацыянальнае заканадаўства.

З даведачнай інфармацыі вынікае, што Еўрапейская камісія прапанавала такія меры яшчэ ў снежні 2022 года, каб абмежаваць абыход санкцый і ўзмацніць жорсткасць іх правапрымянення. У адказ на расійскую агрэсію супраць Украіны ЕС прыняў “беспрэцэдэнтную колькасць абмежавальных мер, каб аслабіць эканамічную базу Расіі і абмежаваць яе здольнасць весці вайну”, сцвярджае Савет ЕС.

22 сакавіка орган заклікаў вярхоўнага прадстаўніка ЕС па замежных справах і палітыцы бяспекі Жазэпа Барэля і Еўрапейскую камісію падрыхтаваць далейшыя санкцыі супраць афіцыйнага Мінска.

ЕС раней увёў у дачыненні да рэжыму Аляксандра Лукашэнкі сем пакетаў санкцый.

Акрамя таго, беларускія фізічныя і юрыдычныя асобы ўключаны ў шэраг пакетаў санкцый ЕС, прынятых у дачыненні да РФ.

24 лютага 2022 года Расія пачала поўнамаштабную вайну супраць Украіны, у якой улады ў Мінску падтрымліваюць Крэмль.