У Палату прадстаўнікоў унесены законапраект аб ратыфікацыі дагавора з РФ аб аб’яднаным рынку электраэнергіі

10 кастрычніка, Позірк. У Палату прадстаўнікоў унесены законапраект аб ратыфікацыі беларуска-расійскай дамовы пра фарміраванне аб’яднанага рынку электраэнергіі Саюзнай дзяржавы.

Як сцвярджае прэс-служба ПП НС, дакумент “пасадзейнічае стварэнню адзінай энергетычнай прасторы, што дазволіць палепшыць каардынацыю і ўзаемадзеянне ў сферы электраэнергетыкі паміж Беларуссю і Расіяй”.

Законапраект “вызначае органы дзяржаўнага кіравання, упаўнаважаныя на кіраванне аб’яднаным рынкам электрычнай энергіі ад беларускага боку”.

Дамова была падпісана ў снежні 2024 года.

7 кастрычніка міністр энергетыкі Дзяніс Мароз заявіў, што “на фінальным этапе знаходзіцца стварэнне агульнага рынку электраэнергіі Беларусі і Расіі, на выхадзе правіла яго функцыянавання”.

Паводле слоў чыноўніка, у спажыўцоў “будзе магчымасць выбіраць пастаўшчыкоў электраэнергіі, якія прапануюць больш камфортныя ўмовы паставак і цэны”.

9 кастрычніка паведамлялася, што на “Пецярбургскім міжнародным газавым форуме” намеснік прэм’ер-міністра Беларусі Віктар Каранкевіч і старшыня праўлення расійскага ПАТ “Газпром” Аляксей Мілер падпісалі дарожную карту супрацоўніцтва да 2030 года.

Як адзначала прэс-служба беларускага ўрада, яна “накіравана на развіццё ўзаемадзеяння ў паліўна-энергетычнай і прамысловай сферах”.