За тыдзень у Беларусь прыбыло 2,55 тыс. грамадзян Украіны — Дзяржпагранкамітэт

12 красавіка, Позірк. З 6 па 12 красавіка (на 6:00) у Беларусь прыбыло 2.550 грамадзян Украіны (30 сакавіка — 5 красавіка — 2.590), вынікае са звестак Дзяржаўнага памежнага камітэта.

Транзітам праз Польшчу прыехала 2.050 чалавек (2.115), Літву — 482 (434), Латвію — 18 (37).

З пачатку года ў краіну ўехала 27.523 грамадзяніна Украіны: транзітам праз Польшчу — 20.529, праз Літву — 6.718, праз Латвію — 257, праз Украіну — 19.

Усяго з 24 лютага 2022 года, калі Расія пачала поўнамаштабную вайну, у Беларусь з украінскай тэрыторыі прыбыло 174.015 грамадзян Украіны: праз украінска-беларускую мяжу — 15.937, транзітам праз Польшчу — 118.317, праз Літву — 34.968, праз Латвію — 4.793.

“Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй, — заявіў у інтэрв’ю (https://pozirk.online/be/longreads/69063) “Позірку” ў лютым амбасадар па асаблівых даручэннях МЗС Украіны па Беларусі Ігар Кізім. —Варта казаць аб звычайных паездках грамадзян Украіны ў Беларусь”.

Паводле яго слоў, у адкрытых крыніцах даных аб колькасці ўкраінцаў, якія выехалі з Беларусі не знайсці. “Сумленным і прыстойным з боку ГПК было б даваць гэтую статыстыку”, — лічыць дыпламат.

“Насамрэч гаворка ідзе не пра транзітных уцекачоў ці людзей, якія заехалі ў Беларусь, каб папрасіць прытулак. Гэта, як і раней, простыя паездкі ўкраінскіх грамадзян”, — адзначыў Кізім.