Дэпутаты ПП НС ухвалілі праект закона аб супрацоўніцтве Беларусі і ААЭ ў процідзеянні тэрарызму
17 красавіка, Позірк. Палатай прадстаўнікоў Нацыянальнага сходу (ПП НС) 17 красавіка прынятыя два законапраекты, накіраваныя на пашырэнне двухбаковага супрацоўніцтва Беларусі з Аб’яднанымі Арабскімі Эміратамі.
Як паведамляе прэс-служба ніжняй палаты парламента, у адным чытанні адобраны праект закона “Аб ратыфікацыі пагаднення аб супрацоўніцтве ў галіне бяспекі і процідзеяння тэрарызму паміж урадам Рэспублікі Беларусь і ўрадам Аб’яднаных Арабскіх Эміратаў”.
Дакумент прадугледжвае выкананне адпаведных міждзяржаўных запытаў аб аказанні садзейнічання; абмен інфармацыяй аб учыненых або рыхтуемых злачынствах, а таксама прыняцце мер, неабходных для іх прадухілення; правядзенне ўзгодненых мерапрыемстваў; абмен прававой і навуковай інфармацыяй; аказанне садзейнічання ў падрыхтоўцы і павышэнні кваліфікацыі кадраў.
“У мэтах рэалізацыі палажэнняў пагаднення плануецца стварэнне сумеснага камітэта па бяспецы, у склад якога ўвойдуць прадстаўнікі міністэрстваў унутраных спраў дагаворных бакоў”, — паведамляе ПП НС.
“Цэнтральным кампетэнтным органам” для супрацоўніцтва з ААЭ законапраект вызначае МУС, паўнамоцтвы таксама атрымаюць Дзяржаўны камітэт судовых экспертыз, Дзяржаўны памежны камітэт, Дзяржаўны мытны камітэт, Дэпартамент фінансавых расследаванняў Камітэта дзяржаўнага кантролю, Камітэт дзяржаўнай бяспекі і Следчы камітэт.
Таксама ў адным чытанні прыняты законапраект па пытаннях узаемнага прызнання і абмену вадзіцельскіх пасведчанняў паміж дзвюма краінамі. Ён замацоўвае абавязацельствы бакоў па ўзаемным прызнанні такіх дакументаў, якія выдаюцца на тэрыторыі іншага боку.
“Такім чынам, грамадзяне Беларусі — уладальнікі вадзіцельскіх пасведчанняў катэгорыі “В”, якія прыбываюць у Аб’яднаныя Арабскія Эміраты ў мэтах, адрозных ад мэтаў пастаяннага пражывання (напрыклад, турызм або працоўная дзейнасць па часовых дагаворах і кантрактах), могуць выкарыстоўваць свае правы кіроўцы для кіравання аўтамабіляў у ААЭ”, — адзначае прэс-служба ПП НС.
Прадугледжваецца магчымасць абмену вадзіцельскага пасведчання катэгорыі “В”, выдадзенага адным бокам, на вадзіцельскае пасведчанне іншага без здачы тэарэтычных і практычных кваліфікацыйных экзаменаў. Такая замена будзе магчымая пры выкананні шэрагу ўмоў, у тым ліку наяўнасці ў заяўніка дзейнага віду на жыхарства, а таксама праходжання заяўнікам медыцынскага агляду ў дзяржаве, у якой ажыццяўляецца абмен.
Беларускія ведамствы ў апошнія гады актывізавалі супрацоўніцтва з ААЭ.
5 сакавіка 2024 года прэс-служба МУС па выніках сустрэчы міністра Івана Кубракова з начальнікам паліцыі Дубая Абдулой Халіфам Аль Мары на палях Сусветнага паліцэйскага саміту ў найбуйнейшым горадзе Аб’яднаных Арабскіх Эміратаў паведаміла, што Міністэрства ўнутраных спраў “гатовае працягнуць праграму падрыхтоўкі эмірацкіх супрацоўнікаў паліцыі ў Беларусі па розных напрамках аператыўна-службовай дзейнасці”.
У лістападзе 2023 года кіраўнік Мінабароны Віктар Хрэнін знаходзіўся з візітам у ААЭ для падпісання пагаднення аб ваенным супрацоўніцтве. Хрэнін таксама наведаў выставу авіяцыйнай тэхнікі, якая прайшла ў рамках авіяшоу “Dubai Airshow 2023”.
На прэс-канферэнцыі 29 лютага ў Мінску Кубракоў заявіў, што ў міліцэйскага ведамства “вельмі цеснае ўзаемадзеянне” з калегамі з Катара і ААЭ.
Аб пашырэнні супрацоўніцтва з ААЭ заяўлялі таксама ў Мінэканомікі. Ведамства ў 2023 годзе было ўпаўнаважанае правесці перамовы з урадам краіны па праекце пагаднення аб “свабодным гандлі паслугамі і ажыццяўленні інвестыцый”.
Дыпламатычныя адносіны паміж краінамі былі ўстаноўленыя 20 кастрычніка 1992 года. Пасольства Беларусі ў Абу-Дабі пачало працу ў снежні 1999 года, а Аб’яднаных Арабскіх Эміратаў у Мінску — у кастрычніку 2008-га.