У сувязі з чэргамі на беларуска-польскай мяжы затрымка зваротнага адпраўлення аўтобусаў дасягае сутак

Крыніца: ГПК

27 красавіка, Позірк. У сувязі з чэргамі на беларуска-польскай мяжы затрымка зваротнага адпраўлення аўтобусаў дасягае сутак, вынікае з паведамленняў прадпрыемства “Мінсктранс“.

З 13 гадзін 27 красавіка на 13 гадзін 28 красавіка перанесены рэйс Мюнхен — Мінск.

Аўтобус Варшава — Мінск замест 23 гадзін 26 красавіка выедзе ў 4 гадзіны 27 красавіка.

У першай палове дня 26 красавіка “Мінсктранс” папярэджваў аб затрымцы на пяць гадзін ранішняга аўтобуса Варшава — Мінск (час адпраўлення 12 гадзін замест 7).

Менш выбіваліся з графіка аўтобусы, якія рухаліся ў Літву. Аўтобусы адпраўленнем у 8 і 14 гадзін з Вільнюса выехалі з мяжы ў літоўскую сталіцу адпаведна ў 10.16 і 14 гадзін.

Паводле звестак Дзяржпагранкамітэта Беларусі на 2 гадзіны 27 красавіка, на выезд з краіны праз пункт пропуску “Брэст“ сабралася 80 аўтобусаў і 1.844 легкавых аўтамабілі. Апоўначы было столькі ж аўтобусаў і 1.865 легкавых аўтамабіляў, у 20 і 22 гадзіны 26 красавіка — 65 аўтобусаў і 1.860 аўтамабіляў.

У пункце пропуску “Каменны Лог“ на мяжы з Літвой у 2 гадзіны 27 красавіка было 1 аўтобус і 80 легкавых аўтамабіляў, “Беняконі” — 40 легкавых аўтамабіляў.

Доўгія чэргі ўзніклі з-за вялікіх выхадных (27-29 красавіка, 1, 3, 4 траўня) і абмежаванай колькасці працуючых пунктаў пропуску, якая звязана з рэакцыяй сумежных краін Еўрасаюза на недружалюбныя дзеянні беларускага рэжыму.