30 чэрвеня, Позірк. Міністрам прамысловасці прызначаны 48-гадовы Андрэй Кузняцоў, які на працягу года займаў пасаду намесніка кіраўніка ведамства. Адпаведнае рашэнне 30 чэрвеня прыняў Аляксандр Лукашэнка, паведамляе яго прэс-служба.
Кузняцоў — ураджэнец Гомеля. У 2001 годзе скончыў Гомельскі дзяржаўны тэхнічны ўніверсітэт імя П. В. Сухога. Пасля выпуску да 2013 года працаваў на Гомельскім заводзе ліцця і нармаляў — пачаў з майстра, скончыў на пасадзе намесніка дырэктара па вытворчасці (2011–2013).
У 2013–2021 гадах працаваў на прадпрыемстве “Брансксельмаш” (Бранск, Расія), у тым ліку на пасадах намесніка генеральнага дырэктара па вытворчасці, галоўнага інжынера і генеральнага дырэктара.
У 2020 годзе Кузняцоў скончыў аспірантуру Бранскага дзяржаўнага аграрнага ўніверсітэта па спецыяльнасці “тэхналогіі, сродкі механізацыі і энергетычнае абсталяванне ў сельскай, лясной і рыбнай гаспадарцы”.
Пасля працы ў РФ ён вярнуўся на родны горад, у 2021–2024 гадах узначальваў прадпрыемства, з якога пачаў свой працоўны шлях — Гомельскі завод ліцця і нармаляў.
Цяпер ужо былы міністр прамысловасці Аляксандр Яфімаў займаў гэтую пасаду крыху больш за год — з 27 ліпеня 2024 года. Да таго ён некаторы час быў намеснікам міністра прамысловасці.
Яфімаў вяртаецца на прадпрыемства “Амкадор”, якім будзе кіраваць другі раз. На гэтым прадпрыемстве былы міністр працаваў аператарам станкоў, начальнікам участку, намеснікам гендырэктара і генеральным дырэктарам. Адметна, што ў красавіку Лукашэнка абвінаваціў уласніка “Амкадора” ў складаным становішчы прадпрыемства. Паводле інфармацыі аб’яднання былых сілавікоў BelPol, прадпрыемства спрабуе абыходзіць заходнія санкцыі.
На падставе рашэння Лукашэнкі першым намеснікам міністра архітэктуры і будаўніцтва стаў Уладзімір Навумовіч, першым намеснікам міністра прыродных рэсурсаў і аховы навакольнага асяроддзя — Максім Лысенка, намеснікам міністра адукацыі (па пытаннях адміністрацыйна-гаспадарчай дзейнасці) — Уладзімір Далжанкоў, намесніцай міністра сувязі і інфарматызацыі — Юлія Шапкіна, намеснікам міністра працы і сацыяльнай абароны — Алег Такун, намеснікам міністра фінансаў — Сяргей Качан, намесніцай міністра юстыцыі — Ірына Сцяпура.
Аляксандр Ломскі прызначаны памочнікам Лукашэнкі — інспектарам па Брэсцкай вобласці.
