За датэрміновым выкарыстаннем сямейнага капіталу часцей за ўсё звяртаюцца для паляпшэння жылля — Мінпрацы

18 красавіка, Позірк. На 1 красавіка 2024 года сямейны капітал налічаны 136.502 шматдзетным сем’ям (годам раней — 125.056; +9,2%), паведамляе прэс-служба Міністэрства працы і сацыяльнай абароны.

Адкрыта 82,6 тыс. дэпазітных рахункаў на 826 млн долараў (колькасць валютных рахункаў і сума на іх не змяніліся за год) і 54 тыс. рахункаў (42,5 тыс.; +27,1%) на 1,36 млрд рублёў (1,02 млрд; +33,3%).

На датэрміновае выкарыстанне сродкаў сямейнага капіталу пададзена 83.685 заяў (69.347; +20,7%), у тым ліку для паляпшэння жыллёвых умоў — 67.998 (годам раней — 57.877; +17,5%), або 81,3% ад усіх заяў, атрымання медпаслуг — 9.269 (6.792; +36,5%), або 11,1%, адукацыі — 6.413 (4.673; +37,2%), або 7,7%, набыцця тавараў для інвалідаў — 5 (5).

23 лютага Аляксандр Лукашэнка падпісаў указ № 69, які робіць больш жорсткімі ўмовы датэрміновага выкарыстання сямейнага капіталу.

Дакумент прадугледжвае ўвядзенне дадатковых умоў для датэрміновага выкарыстання сродкаў на паляпшэнне жыллёвых умоў, а менавіта: адсутнасць ва ўласнасці жылля агульнай плошчай 15 кв. м і больш на аднаго чалавека, у Мінску — 10 кв. м і больш, згоду на зняцце з уліку маючых патрэбу ў паляпшэнні жыллёвых умоў пасля выкарыстання сродкаў на названыя мэты.

Устаноўленая забарона на адчужэнне набытых з выкарыстаннем сродкаў сямейнага капіталу жылых памяшканняў, права ўласнасці на якія зарэгістраванае да 2022 года, на працягу пяці гадоў з даты рэгістрацыі права ўласнасці.

У адпаведнасці з указам аказанне медыцынскіх паслуг за кошт сямейнага капіталу магчыма толькі дзяржаўнымі ўстановамі аховы здароўя і пры паэтапным пералічэнні сродкаў на гэтыя мэты (да 50% — пры заключэнні дагавора і канчатковы разлік — пасля атрымання медыцынскай паслугі).

У сярэдзіне кастрычніка 2023 года ўлады зрабілі больш жорсткімі ўмовы выкарыстання сямейнага капіталу на навучанне. Міністэрства адукацыі вызначыла, што “памер сродкаў сямейнага капіталу, якія штогод выкарыстоўваюцца, не можа перавышаць кошту навучання за бягучы і (або) папярэдні навучальны год, у тым ліку для пагашэння наяўнай запазычанасці за навучанне”. Раней такіх абмежаванняў не было.

1 студзеня 2024 года памер сямейнага капіталу павялічыўся на 5,1% — да 31.480 рублёў.

Сямейны капітал прызначаецца сем’ям пры нараджэнні (усынаўленні, удачарэнні) трэцяга і наступных дзяцей. Праграма сямейнага капіталу з’явілася ў 2015 годзе. З 2020 года з’явілася магчымасць выкарыстоўваць сродкі датэрмінова.

У апошнія гады колькасць насельніцтва Беларусі нязменна скарачаецца: на пачатак 2023 года ў краіне пражывала 9.200.617 чалавек, 2022-га — 9.255.524, 2021-га — 9.349.645, 2020-га — 9.410.259.