Новы закон аб прадпрымальніцтве дапаможа малому бізнесу ўзбуйняцца, сцвярджае міністр эканомікі

22 красавіка, Позірк. “Галоўная мэта закона — стварыць дадатковыя стымулы для таго, каб малы бізнес у Беларусі ўзбуйняўся”, — заявіў дзяржСМІ міністр эканомікі Юрый Чабатар, каментуючы падпісанне Аляксандрам Лукашэнкам 22 красавіка закона па пытаннях прадпрымальніцкай дзейнасці.

Паводле інфармацыі прэс-службы Мінэканомікі, кіраўнік ведамства назваў тры перавагі новага закона: магчымасць перарэгістрацыі ІП у юрыдычную асобу за адзін дзень, захаванне для такіх юрыдычных асоб спрошчанага адміністравання і дадатковыя меры фінансавай падтрымкі малога бізнесу.

“Гэта істотная матывацыя для бізнесу да таго, каб пераходзіць у форму юрыдычнай асобы”, — лічыць Чабатар.

Чыноўнік пакінуў без каментара негатыўныя бакі новага дакумента.

Паводле заявы прэс-службы Лукашэнкі, закон устанаўлівае “абноўленую архітэктуру прадпрымальніцтва”, якая прадугледжвае “дзве катэгорыі, якія займаюцца прадпрымальніцкай дзейнасцю: юрыдычныя і фізічныя асобы”.

Да юрыдычных асоб аднесены малыя арганізацыі з колькасцю працуючых да 100 чалавек, сярэднія — да 250 і буйныя — звыш 250, а да фізічных асоб — рамеснікі, уладальнікі аграэкасядзіб, самазанятыя, індывідуальныя прадпрымальнікі.

Віды дзейнасці, якімі змогуць займацца індывідуальныя прадпрымальнікі, будуць вызначаныя ўрадам да 1 ліпеня.

Па відах дзейнасці, якія не ўвойдуць у плануемы пералік, з 1 кастрычніка спыняецца рэгістрацыя новых ІП.

Таксама ўстанаўліваецца абавязак пераходу да 1 студзеня 2026 года дзеючых індывідуальных прадпрымальнікаў у юрыдычныя асобы. Пры гэтым для такіх прадпрымальнікаў ўводзіцца “спрошчаны парадак пераходу ў камерцыйныя арганізацыі з пераемнасцю па ўсіх правах і абавязацельствах перад бюджэтам і контрагентамі”.

Закон прадугледжвае новыя віды фінансавай падтрымкі, у тым ліку пакрыццё з бюджэту часткі капітальных выдаткаў пры рэалізацыі інвестпраектаў з прыцягненнем крэдытаў Банка развіцця.

Сярэдні бізнес атрымае права на дзяржаўную фінансавую падтрымку, якая была даступная толькі малому бізнесу.

Раней паведамлялася, што ў пераліку не будзе групавога гандлю, турыстычных і юрыдычных паслуг, арганізацыі і правядзення культурных і забаўляльных мерапрыемстваў, некаторых паслуг у галіне ІТ.

Згодна з падлікамі Мінэканомікі, пасля перагляду відаў дзейнасці колькасць індывідуальных прадпрымальнікаў можа скараціцца амаль удвая — з 263 да 143,5 тыс., колькасць нанятых у іх работнікаў — з 64,6 да 47,1 тыс.

Законапраект раней раскрытыкавалі буйныя бізнес-саюзы. “Дзясяткі тысяч фізічных асоб у выпадку, калі ім будзе забаронена займацца пэўнымі відамі дзейнасці, могуць страціць працу”, — заяўляў дырэктар Мінскага сталічнага саюза прадпрымальнікаў і працадаўцаў Віктар Маргелаў.