Міністр абароны Хрэнін адправіўся ў Кітай

26 кастрычніка, Позірк. Міністр абароны Беларусі Віктар Хрэнін 26 кастрычніка накіраваўся з афіцыйным візітам у Кітай, паведамляе прэс-служба ваеннага ведамства.

“Падчас візіту адбудуцца перамовы з членам палітбюро Цэнтральнага камітэта Камуністычнай партыі Кітая, намеснікам старшыні Цэнтральнага ваеннага савета Кітайскай Народнай Рэспублікі”, — гаворыцца ў паведамленні.

Паводле інфармацыі Мінабароны, Хрэнін наведае навучальныя ўстановы і вайсковыя часці кітайскай арміі, а таксама прыме ўдзел у 10-м Сяншанскім форуме па бяспецы. Запланаваны шэраг двухбаковых сустрэч.

Запрашэнне наведаць Кітай сёлета ў сярэдзіне жніўня Хрэніну перадаў міністр абароны КНР Лі Шанфу, які знаходзіўся ў Беларусі з візітам. Неўзабаве пасля гэтай паездкі кітайскі чыноўнік знік з публічнай прасторы, нядаўна з’явілася пацверджаная інфармацыя пра тое, што ён адхілены ад пасады.