Лукашэнка заявіў пра неабходнасць “будаваць пабольш жылля” ў Оршы — за шэсць гадоў насельніцтва горада зменшылася на 10,7%

5 траўня, Позірк. Каб забяспечыць прадпрыемствы Оршы рабочай сілай, неабходна “скарэктаваць падыходы ў жыллёвым будаўніцтве”, заявіў Аляксандр Лукашэнка, наведваючы з нагоды Вялікадня 5 траўня Свята-Ільінскі храм Свята-Успенскага жаночага манастыра ў гэтым горадзе Віцебскай вобласці.

“Я еду і думаю, што нам давядзецца тут будаваць пабольш жылля, каб прыцягнуць людзей, — цытуе Лукашэнку яго прэс-служба. — У іх не хапае людзей. Гадоў 20 таму няма куды было падзець — беспрацоўе. Цяпер людзі працаўладкаваныя”.

Паводле яго слоў, прадпрыемстваў у Аршанскім раёне шмат: “І ў Барані, і паміж Баранню і Оршай. Усюды. І ў сельскай гаспадарцы”.

“Я думаю, нам давядзецца пераарыентавацца і будаваць там, дзе патрэбныя працоўныя рукі. Акрамя шматдзетных і вайскоўцаў. Гэта святое, гэта асобныя чэргі. А астатнія грошы накіраваць на будаўніцтва жылля там, дзе патрэбныя працоўныя рукі”, — сказаў Лукашэнка.

Ён лічыць патрэбным будаваць жыллё, як “у савецкія часы было”.

“Ствараем нейкае прадпрыемства самавітае, а вакол яго — жыллё. Каб людзей прыцягнуць. І нармальны заробак. Гэта такія разважанні, калі я пад’язджаў да свайго і вашага роднага месца”, — адзначыў Лукашэнка.

Насельніцтва Оршы няўхільна скарачаецца шмат гадоў. У 2001 годзе ў горадзе пражывала 123.247 чалавек, на 1 студзеня 2024-га, паводле звестак Белстата, — 102.759.

У 2018 годзе насельніцтва Оршы складала 115.052 чалавекі — да пачатку гэтага года яно зменшылася на 10,7%.

Колькасць насельніцтва Беларусі на 1 студзеня 2024 года склала 9 млн 155 тыс.978 чалавек, сведчаць даныя Белстата. На пачатак 2023 года ў краіне, паводле афіцыйных звестак, пражывала 9 млн 200 тыс. 617 чалавек. Такім чынам, за год колькасць жыхароў зменшылася на 44.639 чалавек (-0,49%).

На 1 студзеня 2022-га ў Беларусі пражывала 9 млн 255 тыс. 524 чалавек, 2021-га — 9 млн 349 тыс. 645, 2020-га — 9 млн 410 тыс. 259.

Са статыстыкі вынікае, што з пачатку 2020 года колькасць жыхароў скарацілася на 254 тыс.281.

З 2020 года Белстат не публікуе даныя аб нараджальнасці і смяротнасці. Пра іх можна меркаваць толькі па ўскоснай інфармацыі.

На хвалі рэпрэсій, якімі ўлады адрэагавалі на масавыя пратэсты пасля выбараў, з краіны з’ехала вялікая колькасць грамадзян. Паводле неафіцыйных звестак, лік ідзе на сотні тысяч чалавек.