Дзяржпамежкамітэт паведаміў пра гібель трох замежнікаў на мяжы Беларусі з краінамі ЕС

7 траўня, Позірк. Дзяржаўны памежны камітэт Беларусі паведаміў у сваім тэлеграм-канале аб выяўленні 3 траўня целаў дваіх замежнікаў на мяжы з Латвіяй, 5 траўня — яшчэ аднаго на мяжы з Польшчай.

Акрамя гэтага, 6 траўня на беларуска-польскай мяжы ў Пружанскім раёне (Брэсцкая вобласць) памежным нарадам выяўленыя двое грамадзян Афганістана.

Са спасылкай на замежнікаў, ведамства заявіла, што яны былі збітыя польскімі сілавікамі пры затрыманні і выправаджаныя “праз брамку для жывёл” на тэрыторыю Беларусі.

ДПК заяўляе, што “нягледзячы на няспынныя факты гібелі замежнікаў на мяжы, улады сумежных краін ЕС не спыняюць практыку гвалтоўных выцясненняў і пакідання уразлівых катэгорый людзей у небяспечнай для жыцця сітуацыі”.

Усяго, паводле звестак беларускага боку, з 2021 года на мяжы з сумежнымі краінамі ЕС супрацоўнікамі ДПК зафіксаваная гібель 52 замежнікаў, 25 з якіх — на мяжы з Польшчай, 9 — з Літвой і 18 — з Латвіяй.

Міграцыйны крызіс на мяжы Беларусі і краін ЕС працягваецца з вясны 2021 года.

З пачатку 2024 года адзначана 12.259 спробаў нелегальнага пераходу мяжы Беларусі і суседніх краін ЕС (Латвіяй — 1.672, Літвой — 185, Польшчай — 10.402). Гэта на 4,2% больш, чым за аналагічны леташні перыяд (11.769).