Лукашэнка заявіў аб зацікаўленасці ў аднаўленні дыялогу з Нарвегіяй
17 траўня, Позірк. Беларусь і Нарвегія на працягу доўгага часу “эфектыўна развівалі гуманітарнае і гандлёва-эканамічнае ўзаемадзеянне, у тым ліку ў сферах машынабудавання, харчовай прамысловасці, навукі, спорту”, заявіў Аляксандр Лукашэнка 17 траўня, віншуючы народ гэтай краіны з Днём Канстытуцыі.
“Нас аб’ядноўваюць клопат пра сваіх грамадзян, імкненне да міру і стварэння, суіснаванне ў згодзе з суседзямі. Перакананы, што аднаўленне двухбаковага дыялогу, заснаванага на такім падмурку, адпавядае інтарэсам насельніцтва абедзвюх дзяржаў, у першую чаргу зацікаўленасці ва ўмацаванні стабільнасці ў рэгіёне. Нашы дзверы заўсёды будуць адчыненыя для нарвежскіх сяброў”, — цытуе Лукашэнку яго прэс-служба.
У аналагічным віншаванні ў 2023 годзе сярод іншага ён адзначыў, што “на жаль, сёння афіцыйны Осла, далучыўшыся да палітычна матываваных нелегітымных санкцый”, супраць Мінска, “парушае правы звычайных беларусаў”.
З красавіка 2022 года нарвежскі пакупнік калійных угнаенняў Yara спыніў закупляць прадукцыю прадпрыемства “Беларуськалій”. Кампанія паведаміла, што “цвёрда прыхільная прынцыпам усеагульных правоў чалавека, асуджае ўсе формы іх парушэнняў і рэпрэсій”.
Нарвегія ўваходзіць у сфарміраваны беларускім урадам спіс “недружалюбных дзяржаў”.
Для прадстаўнікоў бізнесу з гэтых краін, якія валодаюць беларускімі кампаніямі, да канца 2025 года ўведзенае абмежаванне на выплату прыбытку і дывідэндаў.
У сярэдзіне сакавіка Лукашэнка санкцыянаваў спрошчанае адчужэнне маёмасці асоб з “недружалюбных дзяржаў”.
Дэмакратычны лідар Святлана Ціханоўская наведала Осла 29–30 красавіка. Падчас яе візіту стала вядома, што Нарвегія зробіць першы ўнёсак у Міжнародны гуманітарны фонд у падтрымку беларускіх палітвязняў у памеры 10 млн нарвежскіх крон (850 тыс. еўра).
