Грамадзянін Украіны асуджаны у Беларусі за “агентурную дзейнасць”

20 траўня, Позірк. Брэсцкі абласны суд у закрытым рэжыме 15 траўня прызнаў вінаватым 25-гадовага грамадзяніна Украіны Арцёма Макавея паводле арт. 358¹ Крымінальнага кодэкса (агентурная дзейнасць) і асудзіў на шэсць гадоў пазбаўлення волі ў калоніі, паведамляе праваабарончы цэнтр “Вясна”.

Справу разглядаў суддзя Мікалай Сянько. У чым сутнасць абвінавачання, невядома.

Верагодна, Макавея затрымалі 27 студзеня 2023 года ў Кобрыне (Брэсцкая вобласць), адзначаецца ў рэлізе.

Мужчына жыў у Беларусі з 2009 года. Апошнія гады працаваў дыджэем у Брэсце, Кобрыне і Мінску.

Паводле маці Макавея, у студзені 2023 года яго “выклікалі ў міграцыйную службу і прапаноўвалі прайсці там паліграф”. 27 студзеня ён “знік, перастаў адказваць на паведамленні”.