Судзіць завочна Вячорку пачнуць 31 траўня

24 траўня, Позірк. Завочны суд у дачыненні да галоўнага саветніка дэмакратычнага лідара Святланы Ціханоўскай, шматгадовага апазіцыйнага дзеяча Франака Вячоркі пачнецца 31 траўня ў 10.30.

Працэс у Мінскім гарадскім судзе будзе весці суддзя Валянціна Зянкевіч, вядомая вынясеннем палітычна матываваных прыгавораў, у прыватнасці, у 2023 годзе па “справе tut.by”, вынікае з раскладу на сайце Вярхоўнага суда.

Аб пачатку спецвытворчасці Следчы камітэт паведаміў 16 лютага.

35-гадоваму палітыку інкрымінавана дзевяць артыкулаў Крымінальнага кодэкса: ч. 3 арт. 130 (распальванне іншай сацыяльнай варожасці і варожасці), ч. 1 арт. 293 (арганізацыя масавых беспарадкаў, якія суправаджаліся насіллем над асобай, пагромамі, падпаламі, знішчэннем маёмасці або ўзброеным супраціўленнем прадстаўнікам улады), ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх), ч. 1 арт. 356 (здрада дзяржаве), ч. 1 арт. 357 (змова або іншыя дзеянні, учыненыя з мэтай захопу дзяржаўнай улады), ч. 3 арт. 361 (заклікі да мераў абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Беларусі), ч. 1 і 2 арт. 361¹ (стварэнне экстрэмісцкага фарміравання або ўдзел у ім, у тым ліку паўторна), ч. 2 арт. 367 (паклёп у дачыненні да прэзідэнта), арт. 369¹ (дыскрэдытацыя Рэспублікі Беларусь).

“Няхай падавяцца сваёй спецвытворчасцю і сваімі артыкуламі”, — так пракаментаваў “Позірку” пачатую спецвытворчасць Вячорка.

На яго думку, “правасуддзе ўсё роўна наступіць, і ўсе, хто стаяць за ліпавымі абвінавачаннямі, справамі і прыгаворамі, катаваннямі і арыштамі, будуць несці адказнасць”.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый і інш.

Актыўна выкарыстоўваецца супраць апанентаў дзеючай улады, якія пакінулі краіну.

На дадзены момант у спісе фігурантаў, у дачыненні да якіх СК пачаў спецвытворчасць, 103 чалавекі.