10 чэрвеня, Позірк. Просьба пашырыць ужытак беларускай мовы на тэлебачанні дзеля яе папулярызацыі ўтрымліваецца ў петыцыі на адрас Міністэрства інфармацыі, збор подпісаў у падтрымку якой распачаўся 9 чэрвеня.
На 12:00 10 чэрвеня дакумент падпісала 20 інтэрнэт-карыстальнікаў. Збор працягнецца да 24 чэрвеня.
Нягледзячы на афіцыйнае двухмоўе, канстатуецца ў петыцыі, “тэлевізійныя праграмы, якія выходзяць на беларускім тэлебачанні, часта аддаюць прыярытэт рускай мове”.
“Паводле даных статыстыкі, толькі чварціна насельніцтва краіны ўжывае беларускую мову як гутарковую, — гаворыцца ў дакуменце. — Астатнія аддаюць перавагу размаўляць на рускай. Спецыялісты інстытута мовы і літаратуры пры Нацыянальнай Акадэміі Навук Беларусі (арыгінальная назва — Інстытут мовазнаўства імя Якуба Коласа Цэнтра даследаванняў беларускай культуры, мовы і літаратуры НАН. — “Позірк”.) перакананыя, што выратаваць беларускую мову можна з дапамогай папулярызацыі мовы. Акрамя таго, неабходна строга выконваць заканадаўства і нарматыўныя акты, якія датычацца моўнай сферы”.
Моўную палітыку, якая праводзіцца рэжымам Аляксандра Лукашэнкі, можна назваць русіфікацыяй.
Паводле перапісу насельніцтва, колькасць беларусаў, якія лічаць сваёй роднай мовай беларускую, знізілася з 85,6% у 1999 годзе да 61,2% у 2019-м.
Намінальна 40% школ у краіне беларускамоўныя, але навучаецца ў іх усяго каля 10% вучняў (крыху больш за 100 тыс.).
