Беларускія банкі паведамілі пра новаўвядзенні

14 чэрвеня, Позірк. Шэраг банкаў, якія працуюць у Беларусі, паведаміў аб чарговых новаўвядзеннях у абслугоўванні кліентаў, вынікае з праведзенага “Позіркам” аналізу іх прэс-рэлізаў.

“Альфа Банк “у пакеце рашэнняў Crypto па картцы “Белкарт” знізіў з 1% (мінімум 4 рубля) да 0,5% (мінімум 2) ад сумы зняцця камісію за атрыманне наяўных у прыладах банкаў-партнёраў.

“Сбер Банк” устанавіў памеры сутачных лімітаў у беларускіх рублях пры аперацыях, якія здзяйсняюцца з выкарыстаннем банкаўскіх картак. Дзеючыя ліміты, устаноўленыя самастойна кліентам у замежнай валюце, будуць сканвертаваныя па афіцыйным курсе Нацбанка на момант аперацыі.

“МТБанк” з пераліку падраздзяленняў “Белпошты”, у якіх можна папоўніць карткі наяўнымі рублямі, выключыў аддзяленні паштовага аператара ў сталіцы і абласных цэнтрах, а таксама Баранавічах (Брэсцкая вобласць), Бабруйску (Магілёўская вобласць) і Мазыры (Гомельская вобласць). Аперацыі па атрыманні наяўных рублёў з выкарыстаннем картак банка даступныя ва ўсіх паштовых аддзяленнях.

“Тэхнабанк” устанавіў па бягучых (разліковых) рахунках фізічных асоб з афармленнем карткі “Космас”, Mastercard зарплатная, Visa Gold у рублях налічэнне працэнтаў (па выніках месяца) у памеры 2% гадавых.

“БНБ-Банк” устанавіў камісію ў памеры 3% (мінімум 5 рублёў) за зняцце наяўных і ліміт на іх бясплатнае зняцце па картках: Visa Platinum — у інфраструктуры іншых банкаў на суму, якая перавышае 2.500 рублёў / 1.000 долараў / 1.000 еўра / 75.000 расійскіх рублёў у месяц; Visa Infinite — на больш 5.000 рублёў / 2.000 долараў / 2.000 еўра / 150.000 расійскіх рублёў у месяц; Pandacard — больш 1.000 рублёў у месяц; зарплатная карта 1-2-3, Gold travel — больш 2.500 рублёў / 2.000 долараў / 2.000 еўра / 150.000 расійскіх рублёў у месяц.

Банк “ВТБ (Беларусь)” на 3 п.п. паменшыў стаўку па крэдыце на куплю аўтамабіля. Першыя тры месяцы яна складзе 14,9% гадавых і 16,9% — на астатні тэрмін. Крэдытаванне даступнае без закладу, паручыцеляў і даведкі аб даходах на тэрмін да 7 гадоў. У рамках прадукту можна набыць новы або падтрыманы аўтамабіль у крэдыт да 70 тыс. рублёў.

“Цэптэр Банк” знізіў камісію па плацяжах у расійскіх рублях на карысць кліентаў банкаў-нерэзідэнтаў: мінімальны — з 20 да 5 долараў, максімальны — са 120 да 50.

На 1 красавіка 2024 года ў Беларусі зарэгістравана 22 банкі (адзін з іх — “Дэльта Банк” — знаходзіцца ў стадыі банкруцтва).

Іх прыбытак за гэты перыяд павялічыўся на 217,7 млн рублёў (+7,4%) і склаў 3 млрд 157,2 млн рублёў, сведчыць праведзены “Позіркам” аналіз звестак Нацбанка аб працы і ўстойлівасці фінансава-крэдытных устаноў.

Даходы выраслі на 2,8% (з 44 млрд 41 млн да 45 млрд 264,5 млн рублёў), выдаткі — на 2,4% (з 41 млрд 101,5 млн да 42 млрд 107,3 млн).

Нарматыўны капітал павялічыўся на 1,9% (з 19 млрд 961,4 млн да 20 млрд 331,4 млн), актывы, схільныя да крэдытнай рызыкі, — на 1,7% (з 98 млрд 868 млн да 100 млрд 575,3 млн), неабслугоўваныя актывы сталі меншымі на 3,6% (з 4 млрд 991,2 млн да 4 млрд 810,3 млн).