СК распачаў спецвытворчасць у дачыненні да Уладзіміра Раманенкі — за “распальванне варожасці” і “абразу”

24 чэрвеня, Позірк. Следчы камітэт 21 чэрвеня распачаў спецыяльную вытворчасць у дачыненні да Уладзіміра Раманенкі (нарадзіўся 15 сакавіка 1982 года), вынікае з абноўленага пераліку на сайце ведамства.

Мужчына з’яўляецца фігурантам крымінальнай справы паводле ч.1 арт. 130 (наўмысныя дзеянні, скіраваныя на ўзбуджэнне іншай сацыяльнай варожасці і варажнечы паводле прыкметы іншай сацыяльнай прыналежнасці), ч. 1 арт. 368 (публічная абраза прэзідэнта) і арт. 369 (публічная абраза прадстаўніка ўлады ў сувязі з выкананнем ім службовых абавязкаў).

Раманенку прапанавана з’явіцца ў Касцюковіцкі раённы аддзел СК (Гомельская вобласць).

У спісе асоб, якія праходзяць па працэдуры спецвытворчасці, што вядзе згаданае ведамства, мужчына стаў 109-м.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.