Расія абвясціла ў вышук Сахашчыка і Пракоп’ева

2 ліпеня, Позірк. Прадстаўнік Аб’яднанага пераходнага кабінета па абароне і нацыянальнай бяспецы Валерый Сахашчык і былы мінскі рэстаратар, грамадскі дзеяч Вадзім Пракоп’еў абвешчаныя ў вышук Міністэрствам унутраных спраў Расіі.

Адпаведная інфармацыя апублікаваная ў базе вышуку расійскага ведамства.

Сахашчык і Пракоп’еў названыя “арганізатарамі вайсковага фарміравання “Пагоня”.

2 лістапада 2022 года Следчы камітэт Беларусі распачаў у дачыненні да Пракоп’ева, Сахашчыка і “іншых асоб”, якія маюць дачыненне да стварэння добраахвотніцкага фарміравання “Пагоня”, крымінальную справу паводле ч. 1 арт. 3611 Крымінальнага кодэкса (стварэнне экстрэмісцкага фарміравання альбо ўдзел у ім).

“Мы ведаем, што ў Варшаве створаны вербавальны і фінансавы цэнтр так званага палка “Пагоня”, які займаецца адборам асоб мужчынскага полу ва ўзросце ад 20 да 45 гадоў, якія маюць досвед вайсковай службы, — заявіў начальнік аддзела ГУБАЗіК Яўген Пілецкі. — Навучанне і зладжванне баевікоў праводзіцца замежнымі інструктарамі на тэрыторыях Чэхіі, Польшчы і Украіны. Аднымі з арганізатараў гэтага экстрэмісцкага фарміравання з’яўляюцца Вадзім Пракоп’еў і Валерый Сахашчык”.

Аб стварэнні палка “Пагоня” ў складзе Інтэрнацыянальнага легіёна Узброеных сіл Украіны (УСУ) Пракоп’еў абвясціў 30 сакавіка 2022 года. Медыя называлі сузаснавальнікам фарміравання Сахашчыка — экс-камандзіра 38-й Брэсцкай дэсантна-штурмавой брыгады.

У чэрвені паведамлялася, што першая група добраахвотнікаў палка падпісала кантракты з Сіламі спецыяльных аперацый УСУ. У тым жа месяцы адзначалася, што байцоў “Пагоні” трэніруе амерыканец Мэцью Паркер, адзін з інструктараў Інтэрнацыянальнага легіёну.

У верасні 2022 года стала вядома, што Пракоп’еў пакінуў полк, у якім займаў пасаду памочніка камандзіра.

10 ліпеня 2023 года “Радыё Свабода” паведаміла, што полк “Пагоня” “фактычна спыніў існаванне”.

У чэрвені 2023-га паведамлялася аб стварэнні асобнай беларускай дэсантна-штурмавой групы ў складзе УСУ, камандаванне якой прыняў Сахашчык. Паводле яго слоў, гэта рота, “якую ўкамплектоўвалі самі беларусы”. Паводле паведамлення, “беларуская рота другі месяц выконвае баявыя задачы на адным з самых цяжкіх участкаў фронту на паўднёвым усходзе Украіны і атрымлівае баявы досвед, неабходны для стварэння новага, высокатэхналагічнага і высокаэфектыўнага беларускага войска”.

Брэсцкі абласны суд 26 снежня 2023 года завочна прыгаварыў Пракоп’ева да 25 гадоў пазбаўлення волі. Суд таксама пастанавіў спагнаць з яго штраф у памеры 1.000 базавых велічынь (на той момант 37 тыс. рублёў) і забараніў цягам пяці гадоў займаць кіруючыя пасады.

Пракоп’еў прызнаны вінаватым паводле ч. 2 арт. 367 (паклёп у дачыненні да прэзідэнта), ч. 1 і 2 арт. 368 (абраза прэзідэнта), арт. 369 (абраза прадстаўніка ўлады), ч. 1 арт. 130 (распальванне <…> варожасці або варажнечы), ч. 3 арт. 361 (заклікі да захадаў абмежавальнага характару (санкцый), іншых дзеянняў, накіраваных на прычыненне шкоды нацбяспецы Беларусі) КК.

Для Пракоп’ева гэта ўжо другі завочны прысуд на 25 гадоў зняволення. 21 чэрвеня 2023 года Мінскі гарадскі суд асудзіў яго на такі тэрмін па справе аб падпале дома дэпутата Палаты прадстаўнікоў, лідара праўладнай Ліберальна-дэмакратычнай партыі Алега Гайдукевіча. На мужчыну таксама быў накладзены такі ж штраф — 1.000 б. у.

Пракоп’еў уключаны ў спіс асоб, “датычных да тэрарыстычнай дзейнасці”.

Акрамя гэтага, экс-рэстаратар з’яўляецца абвінавачаным падазраваным па “справе Каардынацыйнай рады”, узбуджанай Следчым камітэтам у траўні гэтага года.