Лукашэнка заявіў, што “бліжэйшыя часы” правядзе ў Шклоўскім раёне
7 ліпеня, Позірк. Ліпень з’яўляецца адным з самых цяжкіх месяцаў для працы, бо ў гэты перыяд праходзіць “вялікая колькасць масавых мерапрыемстваў”, а таксама “ў актыўную фазу ўступае ўборачная кампанія”, заявіў Аляксандр Лукашэнка 6 ліпеня ў Александрыі (Шклоўскі раён, Магілёўская вобласць), выступаючы на фестывалі “Купалле. Александрыя збірае сяброў”.
Паводле слоў Лукашэнкі, якія перадае яго прэс-служба, на сваю малую радзіму ў Шклоўскі раён ён прыбыў непасрэдна з Астаны (Казахстан), дзе 3–4 ліпеня праходзіў саміт Шанхайскай арганізацыі супрацоўніцтва.
“І, вяртаючыся дадому, я загадзя запланаваў, што павінен прызямліцца тут (аэрапорт добры), таму што на усходзе вельмі шмат назапасілася спраў. І адсюль у бліжэйшыя часы буду працаваць, глядзець, як мы рыхтуемся да ўборкі ўраджаю. Ураджай у полі як ніколі. Я не памятаю такога года для аграрыяў, як гэты. Пакуль бог адарыў нас выдатным ураджаем, праца будзе найцяжэйшая”, — сказаў Лукашэнка.
“Трэба паглядзець, як тут, ва ўсходніх рэгіёнах, справяцца з гэтым людзі”, — дадаў ён.
Пасля вялікай рабочай нагрузкі, паводле яго слоў, важна наведваць “сваю родную зямлю”, дзе “як быццам акунаешся ў іншы свет”.
“Ты прыходзіш да сваіх вытокаў, тут табе лепш, прасцей. І літаральна за суткі ты становішся здаровым, моцным, як і раней у тыя часы, калі ты хадзіў па гэтай зямлі. Ты вельмі хутка аднаўляешся”, — удакладніў Лукашэнка.
Выступаючы перад прысутнымі, ён адзначыў наяўнасць сярод гледачоў сваіх “землякоў”, якія пра яго “чаго граху таіць, ведаюць усе”.
“І гэта самае складанае. Гэта самае складанае — прыйсці да вас, казаць тут нешта, выступаць, разумеючы, што людзі ў гэтым амфітэатры думаюць пра цябе рознае. І самае цяжкае тое, што ты ўспрымаеш гэта як нейкі папрок з вашага боку, — што ты чагосьці яшчэ не дарабіў, ты нешта не зрабіў… А чаму? Я ведаю, вы не адчувалі гэтага. І не дай вам бог, атрымаўшы ад кагосьці ўсё, што вы хацелі, потым не апраўдаць гэты давер. Найцяжэйшае для чалавека”, — заявіў прамоўца.
Звярнуўшыся да тэрміну свайго знаходжання ва ўладзе (з 1994 года), Лукашэнка падкрэсліў: “Здавалася, за тры дзясяткі гадоў пара ўжо і неяк закасцянець, супакоіцца. Але нічога падобнага. І гэта ўсё адсюль, ад гэтай зямлі: шанаваць людзей, дарыць ім шчасце, рабіць усё для таго, каб яны пра цябе проста дрэнна не думалі”.
Колькі часу ён правядзе ў Шклоўскім раёне, Лукашэнка не ўдакладніў.
У вячэрнім эфіры 5 ліпеня расійскі тэлеканал “Дождж” паведаміў, што падчас саміту ШАС у Астане Лукашэнку “стала дрэнна”.
Паводле звестак медыя, гэта адбылося 3 ліпеня, праз “паўтары — дзве гадзіны” пасля прылёту ў сталіцу Казахстана.
“Яго стан стаў рэзка пагаршацца на вачах ва ўдзельнікаў саміту. На наступны дзень, у чацвер, ён выступаў на саміце, сустракаўся з кіраўнікамі дзяржаў, але відаць, што ён выглядае горш, чым два дні таму, і напярэдадні, калі ў ваенным кіцелі прымаў парад у Мінску. Твар бледны, блішчыць, гаворка не вельмі ўпэўненая”, — сказаў тэлевядучы Міхаіл Фішман.
У сакавіку 2021 года кіраўнік Народнага антыкрызіснага ўпраўлення, былы дыпламат Павел Латушка паведаміў аб 15 рэзідэнцыях Лукашэнкі. Адна з іх, паводле яго слоў, размешчаная ў Шклоўскім раёне.