“Расатам” — у адказ на прэтэнзіі Лукашэнкі аб парушэнні тэрмінаў будаўніцтва АЭС: У Расіі і Беларусі няма нявырашаных пытанняў па праекце

31 кастрычніка, Позірк. У Расіі і Беларусі няма нявырашаных пытанняў па праекце Беларускай атамнай электрастанцыі, затрымка яе будаўніцтва адбылася “з-за пандэміі і ўзрослых санкцыйных рызык”, заявілі ў расійскай дзяржкарпарацыі “Расатам” у адказ на прэтэнзіі Аляксандра Лукашэнкі аб парушэнні тэрмінаў уводу АЭС у эксплуатацыю.

“Задача паскорыць працэсы на шкоду патрабаванням бяспекі ніколі не стаяла”, — цытуе заяву расійскай дзяржкарпарацыі агенцтва РІА “Навіны”.

“Мы шчыльна ўзаемадзейнічаем з беларускімі партнёрамі і сумесна вырашаем пытанні, якія ўзнікаюць у ходзе рэалізацыі праекта, уключаючы тэрміны здачы другога энергаблока. Апошні раз гадзіннікі па праекце мы звяралі зусім нядаўна — 16 кастрычніка адбылася сустрэча генеральнага дырэктара “Расатама” Аляксея Яўгенавіча Ліхачова з прэм’ер-міністрам Рэспублікі Беларусь Раманам Аляксандравічам Галоўчанкам”, — адзначылі ў “Расатаме”.

Што тычыцца тэрмінаў рэалізацыі праекта, то, падкрэсліваецца, тут неабходна ўлічваць “шэраг фактараў”.

Акрамя пандэміі і санкцый, удакладняецца ў заяве, варта браць пад увагу тое, што “праект рэалізоўваўся ў краіне, якая ўпершыню ўстала на шлях вялікай атамнай энергетыкі”.

“Поўны тэрмін жыцця АЭС — 80 гадоў з улікам наступнага вываду з эксплуатацыі. Улічваючы ўсю складанасць і жыццёвы цыкл праекта, для нас з’яўляецца нармальнай практыкай ісці насустрач заказчыкам па асобных пазіцыях на ўзаемавыгадных умовах. З улікам існуючых даверных адносін з нашым беларускім заказчыкам мы не каментуем камерцыйны складнік праекта”, — заявілі ў дзяржкарпарацыі.

“Расатам” звярнуў увагу, што “Аляксандр Рыгоравіч Лукашэнка рэгулярна ўнікае ў праект збудавання станцыі аж да тэхнічных пытанняў, прад’яўляе гранічна жорсткія патрабаванні да ўсіх удзельнікаў праекта, і перш за ўсё да профільных кіраўнікоў урада Рэспублікі Беларусь”.

31 кастрычніка, прымаючы даклад аб завяршэнні будаўніцтва БелАЭС, Лукашэнка заявіў, што тэрміны ўводу ў эксплуатацыю БелАЭС парушаныя па віне расійскага боку.

Ён адзначыў, што перад расійскім бокам было пастаўленае “пытанне аб кампенсацыях”, у адказ на што “яны нам прапанавалі варыянты і по цане на свежае ядзернае паліва — як для расійцаў, як для сваіх станцый”, і пяцігадовы гарантыйны тэрмін на асноўныя вузлы.

Паводле слоў Лукашэнкі, пры будаўніцтве станцыі беларускі бок вылучаў жорсткія патрабаванні да “Расатама” “па рознага роду нюансах”, паколькі “мы — чарнобыльская рэспубліка”.

Беларуская АЭС узводзіцца паблізу Астраўца (Гродзенская вобласць) пераважна за кошт крэдыту Расіі па расійскім праекце ВВЭР-1200. Генеральным праекціроўшчыкам і генпадрадчыкам выступае інжынірынгавая кампанія “АСЭ”, якая з’яўляецца галаўной арганізацыяй інжынірынгавага дывізіёна расійскай дзяржкарпарацыі “Расатам”.

Першы энергаблок сілкуе энергасістэму з 3 лістапада 2020 года (прамыслова эксплуатуецца з чэрвеня 2021-га). 6 кастрычніка 2023 года на аб’екце пачаўся чарговы планава-папераджальны рамонт. На перыяд яго правядзення блок адлучаць ад сеткі.

Другі блок працуе ў рэжыме доследна-прамысловай эксплуатацыі, вырабляе электраэнергію з 13 траўня гэтага года. У сярэдзіне кастрычніка завяршыліся фінальныя 15-дзённыя выпрабаванні яго абсталявання, вынікі якіх “Расатам” ацаніў станоўча. Міністэрства па надзвычайных сітуацыях на пасяджэнні калегіі 24 кастрычніка выдала ліцэнзію на прамысловую эксплуатацыю другога энергаблока Беларускай АЭС. У адпаведнасці з указам Лукашэнкі ад 30 лістапада 2020 года № 447 увод у эксплуатацыю першага блока БелАЭС павінен быў быць ажыццёўлены ў 2021 годзе, а ўсёй АЭС — у першым паўгоддзі 2022 года.