26 ліпеня, Позірк. У былога польскага суддзі Томаша Шмыта, які ўцёк у Беларусь, магла быць база даных суддзяў, пракурораў, работнікаў судоў і іншых суайчыннікаў, ён мог перадаць яе беларускім спецслужбам, піша выданне Rzeczpospolita.
Шмыт, адзначае выданне са спасылкай на суддзю Аркадыюша Ціхоцкага, узначальваў юрыдычны аддзел у Нацыянальнай радзе суддзяў Польшчы. Раней гэты орган выступаў з ініцыятывай па ўзмацненні сваёй дзейнасці ў сферы кантролю за кіраваннем персанальнымі звесткамі ў судах. Ідэя заключалася ў тым, што ва ўсіх судоў павінны быць даныя пра кожнага чалавека, які звярнуўся па вырашэнне сваёй справы ў судовым парадку. Паводле слоў Ціхоцкага, Шмыт ухваліў рэалізацыю гэтай ідэі.
Такім чынам, мяркуе выданне, гэта магло прывесці да канцэнтрацыі асабістых даных грамадзян, суддзяў, пракурораў “у адных руках”.
Суразмоўца медыя таксама нагадаў, што Шмыт у якасці суддзі займаўся справай аб уцечцы даных больш за 50 тыс. чалавек з Нацыянальнай школы судовай улады і пракуратуры.
“Мне хочацца верыць, што ён апынуўся за мяжой без якога-небудзь папярэдняга плана, але калі ён гэта планаваў, то даныя, якія ён меў, былі б надзвычай каштоўнымі для замежнай дзяржавы”, — заявіў Ціхоцкі.
Пра тое, што суддзя 2-га аддзялення Ваяводскага адміністрацыйнага суда Варшавы Шмыт уцёк у Беларусь, стала вядома 6 траўня з паведамлення тэлеграм-канала, створанага трыма днямі раней ад яго імя на польскай і рускай мовах. У ім сцвярджалася, што мужчына вымушана пакінуў Польшчу “з прычыны нязгоды з палітыкай і дзеяннямі ўладаў”. Ён нібыта “падвяргаўся пераследам і пагрозам за самастойную палітычную пазіцыю”.
Прэм’ер-міністр Польшчы Дональд Туск заявіў 7 траўня, што спецслужбы Беларусі даўно працавалі са збеглым суддзёй Шмытам, яго стасункі з беларусамі “маюць даўнюю гісторыю”, гэта не справа “апошніх месяцаў”.
9 траўня Шмыт быў звольнены Вышэйшым адміністрацыйным судом на падставе яго заявы. Нацыянальная пракуратура Польшчы пачала расследаванне.
4 чэрвеня стала вядома, што Шмыт не будзе ўключаны ў спіс асоб, якія адшукваюцца Інтэрполам з “чырвоным апавяшчэннем”. Паводле інфармацыі прэс-сакратара Галоўнага ўпраўлення паліцыі Польшчы Катажыны Новак, гэта звязана з тым, што Інтэрпол “не дазваляе перадаваць па сваіх каналах даныя наконт дзеянняў супраць бяспекі дзяржавы, якія вызначаюцца як палітычныя злачынствы”. Да такіх дзеянняў, адзначыла Новак, Інтэрпол адносіць шпіянаж.
10 чэрвеня акруговы суд Варшавы выдаў ордар на арышт Шмыта. Ордар мае сілу толькі на тэрыторыі дзяржаў, якія ўваходзяць у Еўрасаюз, гэта значыць не будзе мець рэальнай сілы, пакуль перабежчык не перасячэ мяжу адной з краін ЕС.
У Беларусі Шмыт пачаў працаваць у дзяржаўным інфармагенцтве БелТА.
