Польскі суд выдаў ордар на арышт у ЕС экс-суддзі Шмыта, які хаваецца ў Беларусі

10 чэрвеня, Позірк. Еўрапейскі ордар на арышт польскага экс-суддзі Томаша Шмыта, які знаходзіцца ў Беларусі, выдадзены 10 чэрвеня акруговым судом Варшавы, паведамляе RMF FM.

Адзначаецца, што ордар мае сілу толькі на тэрыторыі дзяржаў, якія ўваходзяць у Еўрасаюз, гэта значыць не будзе мець рэальнай сілы, пакуль Шмыт не перасячэ мяжу адной з краін ЕС.

5 чэрвеня беларускія дзяржаўныя СМІ паведамілі, што Шмыт звярнуўся да генеральнага пракурора Польшчы з просьбай прыцягнуць да крымінальнай адказнасці міністра замежных спраў Радаслава Сікорскага за тое, што апошні ў мясцовых СМІ неаднаразова называў былога суддзю здраднікам.

4 чэрвеня стала вядома, што Шмыт не будзе ўключаны ў спіс асоб, якія вышукваюцца Інтэрполам з “чырвоным паведамленнем”. Паводле інфармацыі прэс-сакратара Галоўнага ўпраўлення паліцыі Польшчы Катажыны Новак, гэта звязана з тым, што Інтэрпол “не дазваляе перадаваць па сваіх каналах даныя адносна дзеянняў супраць бяспекі дзяржавы, якія вызначаюцца як палітычныя злачынствы”. Да такіх дзеянняў, адзначыла Новак, Інтэрпол адносіць шпіянаж.

У сярэдзіне траўня Варшаўскі акруговы суд задаволіў хадайніцтва пракуратуры аб завочным арышце Шмыта на тры месяцы. Паведамлялася, што пасля гэтага наглядны орган абвесціць экс-суддзю ў вышук на тэрыторыі Польшчы і будзе дамагацца выдачы еўрапейскага ордара на яго арышт.

Інфармацыя пра тое, што суддзя 2-га аддзялення Ваяводскага адміністрацыйнага суда Варшавы Шмыт “пакуль неафіцыйна” папрасіў “статус палітычнага ўцекача” ў Беларусі, з’явілася 6 траўня ў тэлеграм-канале, створаным трыма днямі раней ад яго імя на польскай і рускай мовах.

Сцвярджалася, што Шмыт вымушана пакінуў Польшчу “з прычыны нязгоды з палітыкай і дзеяннямі ўладаў”. Ён нібыта “зведваў пераслед і пагрозы за самастойную палітычную пазіцыю”.

Беларуская дзяржаўная прапаганда называе яго дысідэнтам.