Пуцін па тэлефоне падзякаваў Лукашэнку за дачыненне да абмену зняволенымі

2 жніўня, Позірк. Прэзідэнт РФ Уладзімір Пуцін праз тэлефон “сардэчна падзякаваў” Аляксандру Лукашэнку за “ўдзел і дапамогу ў працэсе абмену [зняволенымі]”, які адбыўся 1 жніўня.

Як паведамляе прэс-служба Лукашэнкі, бакі “абмеркавалі працоўныя пытанні”, што падымаліся на Валааме (Карэлія) у рамках ягонага візіту ў Расію 25-27 ліпеня. Тады падрабязнасці сустрэч не паведамляліся.

Напярэдадні прэс-служба Крамля назвала “жэстам добрай волі” памілаванне грамадзяніна ФРГ Рыка Крыгера, асуджанага на смяротнае пакаранне ў Беларусі.

Беларусь падключылася да абмену зняволенымі паміж Расіяй і краінамі Захаду, таму што яе пра гэта “папрасілі”, заявіў 2 жніўня Лукашэнка, размаўляючы з мясцовымі жыхарамі падчас паездкі ў Мазырскі раён Гомельскай вобласці.

Крыгер вызвалены ў межах праведзенага паміж Расіяй, ЗША і Германіяй найбуйнейшага за многія гады абмену зняволенымі.

Прэс-служба Крамля 1 жніўня паведаміла, што Пуцін падпісаў указы аб памілаванні Пола Уілана (былы амерыканскі марскі пяхотнік), Эвана Гершковіча (амерыканскі журналіст), Кевіна Ліка (ураджэнец Германіі, пераехаў у РФ з расійскай маці), Дэмуры (Дытэра) Вароніна (расійска-нямецкі палітолаг), Уладзіміра Кара-Мурзы, Алсу Курмашавай, Ліліі Чанышавай, Вадзіма Астаніна, Ясеніі Фадзеевай, Аляксандры Скачыленка, Іллі Яшына, Андрэя Піваварава і Алега Арлова.

У абмен Масква атрымала расіян, асуджаных у ЗША і Еўрасаюзе. Сярод іх супрацоўнік спецслужбаў Вадзім Красікаў, які атрымаў у Германіі пажыццёвы тэрмін за забойства; прызнаныя вінаватымі ў шпіянажы Арцём і Ганна Дульцевы, якія адбывалі пакаранне ў Славеніі, а таксама Міхаіл Мікушын, Павел Рубцоў, Раман Селязнёў, Уладзіслаў Клюшын, Вадзім Канашчонак.

Офіс Святланы Ціханоўскай не ўдзельнічаў у перамовах аб абмене зняволенымі.