Два падлеткі атрымалі сур’ёзныя траўмы ў выніку выбуху ў Шклоўскім раёне — СК (дапоўнена)

19 кастрычніка, Позірк. Аб шпіталізацыі двух падлеткаў у Шклоўскім раёне (Магілёўская вобласць) паведамляе Следчы камітэт.

Інцыдэнт адбыўся 19 кастрычніка ў аграгарадку Чарнаручча. “Двое хлопцаў (13 і 14 гадоў) вырашылі правесці эксперымент з порахам ад петард. У выніку неасцярожнага абыходжання з агнём і гаручым парашком адбыўся выбух. Абодва школьнікі атрымалі сур’ёзныя траўмы і цяпер знаходзяцца ў бальніцы”, — адзначае ведамства.

На месцы здарэння працавала следча-аператыўная група. “Шклоўскім раённым аддзелам Следчага камітэта праводзіцца праверка, высвятляюцца ўсе абставіны здарэння. Асаблівая ўвага будзе нададзеная прычынам і ўмовам, якія спрыялі траўміраванню падлеткаў”, — гаворыцца ў паведамленні.

У 2024 годзе ад знешніх прычын у краіне загінула 126 дзяцей — на 34% больш, чым у 2023-м (94), паведаміў у сакавіку намеснік начальніка галоўнага ўпраўлення — начальнік упраўлення па наглядзе ў сацыяльнай сферы Генеральнай пракуратуры Павел Зайцаў.

Асноўнымі прычынамі гібелі былі суіцыд, дарожна-транспартныя здарэнні, утапленні і пажары.

Дапаўненне.

Міністэрства аховы здароўя паведаміла, што пацярпелым школьнікам аказваецца “ўся неабходная дапамога”.

“Аднаго з пацярпелых шпіталізавалі ў Рэспубліканскі цэнтр агнястрэльнай і мінна-выбуховай траўмы на базе Галоўнага ваеннага клінічнага медыцынскага цэнтра ў Мінску. Другі падлетак знаходзіцца ў Магілёўскай абласной дзіцячай бальніцы”, — удакладнілі ў ведамстве.

Адзначаецца, што ў падлеткаў дыягназаваныя “апёкі, ірваныя раны, парэзы і г.д”.