Сузаснавальніца Беларускага Свабоднага тэатра Наталля Каляда атрымала Ордэн Брытанскай імперыі

3 лістапада, Позірк. Сузаснавальніца Беларускага Свабоднага тэатра Наталля Каляда атрымала Ордэн Брытанскай імперыі (МВЕ) за ўклад у развіццё праекта. Пра гэта 3 лістапада паведаміў у сваім тэлеграм-канале муж Каляды, драматург і сузаснавальнік тэатра Мікалай Халезін.

“Людзі, якіх прысвячаюць у ордэн Брытанскай імперыі адзначаюцца за выдатныя заслугі, асабістую адвагу, іх службу Вялікабрытаніі і дзейнасць па свеце, — адзначыў Халезін. — Спісы публікуюцца двойчы на год: на Новы год і Дзень нараджэння манарха”.

Халезіну ўзнагароду ўручаць 24 студзеня 2024 года

Пра тое, што муж і жонка ўдастоены званняў членаў ордэна, стала вядома 17 чэрвеня.

Як адзначала тады Каляда ў “Фэйсбуку”, гэтая ўзнагарода прызнае іх дасягненні ў свеце тэатра, “мастацкі выраз пастаяннай барацьбы за правы і свабоды чалавека, якая забяспечваецца дэмакратыяй, якую мы зараз называем домам”. Яна выказалася за найхутчэйшае спыненне вайны з Украінай і дыктатуры ў Беларусі.

Халезін тады ж напісаў: “Мы нястомна змагаемся за свабоду самавыяўлення і права займацца мастацтвам, таму што яно фарміруе тое, кім мы з’яўляемся як людзі і як нацыі”.

Як адзначаецца на сайце Беларускага Свабоднага тэатра, які базуецца цяпер у Лондане, ён быў заснаваны ў 2005 годзе і з’яўляецца адзіным тэатрам у Еўропе, забароненым урадам па палітычных матывах.

Тэатр адзначаны такімі ўзнагародамі, як Прэмія Французскай Рэспублікі па правах чалавека (2007 год), Прэмія Атлантычнай рады (2011 год) і Прэмія Вацлава Гавела за творчае іншадумства (2018 год).

Каляда і Халезін заснавалі Глабальную мастацкую кампанію “Свабодная Беларусь”, у рамках якой працуюць з міжнароднымі арганізацыямі ў тым ліку па пытанні санкцый супраць афіцыйнага Мінска.

31 кастрычніка стала вядома, што тэлеграм-чат Халезіна “Khalezin Chat” быў уключаны ў размешчаны на сайце Міністэрства інфармацыі Рэспубліканскі спіс экстрэмісцкіх матэрыялаў.

Ордэн Брытанскай імперыі — рыцарскі ордэн, заснаваны брытанскім каралём Георгам V 4 чэрвеня 1917 года. Гэта самы малодшы ордэн у брытанскай узнагароднай сістэме.