У ДТЗ у Іркуцкай вобласці загінулі два беларусы — амбасада ў РФ

3 лістапада, Позірк. Два грамадзяніны Беларусі загінулі ў дарожна-транспартным здарэнні ў Іркуцкай вобласці, паведамляе амбасада Беларусі ў Расіі.

Адзначаецца, што даныя прадстаўленыя “паводле папярэдняй інфармацыі”.

ДТЗ здарылася 3 лістапада ў Куйтунскім раёне.

“Амбасада Беларусі знаходзіцца ў кантакце з расійскімі кампетэнтнымі органамі для ўдакладнення ўсіх абставінаў трагедыі і аказання неабходнага консульскага садзейнічання сем’ям загінулых”, — гаворыцца ў паведамленні.

Міністэрства замежных спраў выказала спачуванні родным і блізкім загінулых, а таксама падзякавала “расійскім экстранным службам і медыцынскім работнікам за аператыўныя дзеянні на месцы здарэння”.

Аб смяротным ДТЗ у Іркуцкай вобласці раней паведаміў губернатар гэтага суб’екта РФ Ігар Кобзеў.

Паводле інфармацыі чыноўніка, чатыры вялікагрузы сутыкнуліся на федэральнай аўтадарозе Р-255 “Сібір”. Два кіроўцы загінулі на месцы. Яшчэ дваіх мужчын даставілі ў бальніцы, адзін з іх пасля памёр. Яшчэ адзін чалавек атрымаў удары, ад шпіталізацыі адмовіўся.

“Вядома, што сярод загінулых і пацярпелых — грамадзяне Рэспублікі Беларусь і Кітайскай Народнай Рэспублікі. Аб тым, што адбылося, праінфармавалі МЗС Кітая і Беларусі”, — адзначыў Кобзеў.