Лукашэнка, які ігнаруе запыты аб выдачы экс-прэзідэнта Кыргызстана, павіншаваў з 55-годдзем цяперашняга лідара краіны

6 снежня, Позірк. Прэс-служба Аляксандра Лукашэнкі 6 снежня паведаміла аб накіраванні ім віншавання на адрас прэзідэнта Кыргызстана Садыра Жапарава ў сувязі з 55-годдзем.

У віншаванні, у прыватнасці, указваецца на “эфектыўную палітыку”, якую праводзіць Жапараў. Яна “арыентаваная на рост дабрабыту народа і ўмацаванне міжнароднага аўтарытэту дзяржавы”. Выказваецца надзея, што нядаўнія сустрэчы Лукашэнкі і лідара Кыргызстана ў Мінску і Бішкеку “нададуць пазітыўны імпульс двухбаковым стансункам, напоўняць іх новым практычным зместам”.

Пры гэтым афіцыйны Мінск ігнаруе запыты кыргызскай генпракуратуры аб выдачы былога прэзідэнта Кыргызстана Курманбека Бакіева, які атрымаў палітычны прытулак у Беларусі ў 2010 годзе. Бакіеў завочна прыгавораны на радзіме ўжо да некалькіх працяглых тэрмінаў пазбаўлення волі па справах, звязаных з карупцыяй.