Чэхія дазволіла асобным катэгорыям беларусаў падаваць дакументы без апастылю

18 студзеня, Позірк. Прага прыпыніла патрабаванне аб апастылізацыі дакументаў для грамадзян Беларусі, якія знаходзяцца ў Чэхіі на падставе доўгатэрміновай візы, дазволу на часовае ці пастаяннае пражыванне, паведамляе офіс беларускіх дэмакратычных сіл у гэтай краіне.

Падкрэсліваецца, што гэта не тычыцца беларусаў, якія знаходзяцца ў Чэхіі на падставе кароткатэрміновых віз.

4 верасня 2023 года Аляксандр Лукашэнка падпісаў указ № 278 “Аб парадку выдачы дакументаў і здзяйснення дзеянняў”. У адпаведнасці з ім апастыляваць дакументы могуць кампетэнтныя органы (МЗС, Міністэрства адукацыі, Мінюст і галоўныя ўпраўленні юстыцыі Мінгарвыканкама і аблвыканкамаў — у залежнасці ад тыпу дакумента).

Падаць дакументы для прастаўлення апастыля можна толькі пры асабістым візіце ці праз трэцюю асобу, на якую маецца даверанасць, аформленая ў Беларусі.

Раней падаваць дакументы для прастаўлення апастыля можна было праз беларускія консульскія ўстановы за мяжой.

З 1 студзеня 1993 года афіцыйныя дакументы, якія выдаюцца дзяржустановамі Беларусі для выкарыстання на тэрыторыі 125 дзяржаў — удзельніц Гаагскай канвенцыі ад 5 кастрычніка 1961 года (скасавала патрабаванне аб легалізацыі замежных афіцыйных дакументаў), легалізуюцца шляхам прастаўлення апастыля.

Пры гэтым дакументы, прызначаныя для падачы ў органы дзяржаў, што не далучыліся да Гаагскай канвенцыі, пацвярджаюцца шляхам консульскай легалізацыі.