Міністр інфармацыі: Наша інфаполе стракаціць апанентамі

31 студзеня, Позірк. Дзяржаўныя СМІ ў Беларусі працуюць “ва ўмовах інфармацыйных войнаў”, заявіў 31 студзеня міністр інфармацыі Уладзімір Пярцоў на паседжанні калегіі галоўнага ўпраўлення ідэалагічнай працы Магілёўскага аблвыканкама.

Звяртаючыся да чыноўнікаў і ідэолагаў, міністр адзначыў, што кожны з іх разумее, “у які адказны перыяд” яны зараз працуюць.

“Мы <…> бачым, якое перастраенне зараз адбываецца ў інтэрнэт-прасторы, — цытуе Пярцова прэс-служба Мінінфарма. — Нашае інфаполе стракаціць апанентамі, а таму дзейнасць рэдакцый у цэлым і кожнага журналіста ў прыватнасці павінна быць выверанай, дакладнай і аператыўнай”.

Заява прагучала на фоне пераследу журналістаў, супрацоўнікаў СМІ і блогераў, які працягваецца ў Беларусі. Пераважная большасць незалежных медыяў пазбаўлены магчымасці працаваць у краіне, іх дзейнасць, а таксама любое супрацоўніцтва з імі дэ-факта крыміналізаваны пад выглядам барацьбы з экстрэмізмам.

Незалежныя медыі зазнаюць прагрэсавальны ціск і абмежаванні з боку дзяржавы, адзначаецца ў справаздачы “СМІ ў Беларусі ў 2023 годзе”, апублікаванай 31 студзеня Беларускай асацыяцыяй журналістаў (БАЖ).

Паводле інфармацыі БАЖ, 35 супрацоўнікаў СМІ знаходзяцца ў зняволенні. У 2023 годзе “журналісты падвяргаліся адміністрацыйным арыштам 16 разоў”, адбылося “46 затрыманняў журналістаў і 34 ператрусы іх дамоў і офісаў”.

“На працягу года “экстрэмісцкімі фармаваннямі” былі прызнаныя 10 незалежных СМІ (удвая больш, чым летась), а таксама [сам] БАЖ. 33 асуджаныя работнікі СМІ былі ўключаны ў афіцыйны спіс “экстрэмістаў” і 12 — у спіс “тэрарыстаў”, — удакладняецца ў даследаванні.

Эксперты адзначаюць, што блакаваўся доступ да кантэнту сродкаў масавай інфармацыі, якія працягвалі сваю дзейнасць з-за мяжы.

У Крымінальным кодэксе з’явіліся новыя артыкулы за “экстрэмізм”. У прыватнасці, артыкул 289¹ прадугледжвае адказнасць за “прапаганду тэрарызму або яго публічнае апраўданне” (максімальнае пакаранне — 7 гадоў пазбаўлення волі), артыкул 369¹ (дыскрэдытацыя Рэспублікі Беларусь) дапоўнены адказнасцю за “распаўсюджванне заведама ілжывай інфармацыі, якая дыскрэдытуе Узброеныя сілы. воінскія фарміраванні, ваенізаваныя арганізацыі”.

30 чэрвеня мінулага года былі прыняты змены ў закон “Аб сродках масавай інфармацыі”. Уведзены патрабаванні да функцыянавання агрэгатараў навін (у тым ліку прадугледжана магчымасць іх блакіроўкі за распаўсюджванне кантэнту заблакаваных сайтаў), пашыраны пералік падстаў для пазбаўлення СМІ рэгістрацыі і абмежавання доступу да інтэрнэт-рэсурсаў, устаноўлена магчымасць прымянення сіметрычных мер у адказ на “антыбеларускія” выпады. замежных СМІ і журналістаў.