Raiffeisenbank прадасць “Прыёрбанк” інвестару з ААЭ да канца года

20 верасня, Позірк. Raiffeisen Bank International AG (RBI) прадае 87,74% сваіх акцый у ААТ “Прыёрбанк” і яго даччыных кампаніях інвестару з Аб’яднаных Арабскіх Эміратаў Soven 1 Holding Limited.

Аб падпісанні 20 верасня адпаведнага пагаднення паведамляецца на сайце “Прыёрбанка”.

Чакаецца, што цалкам здзелка будзе завершана ў чацвёртым квартале 2024 года.

Заяўляецца, што новы ўласнік “мае намер спрыяць росту і развіццю патэнцыялу банка”, які ў выніку заключанай здзелкі “ўмацуе прыхільнасць сваім кліентам, кіраўніцтву і адданым супрацоўнікам”.

“Паралельна з працэсам набыцця “Прыёрбанк” працягне абслугоўваць кліентаў у адпаведнасці са сваімі аперацыйнымі і стратэгічнымі банкаўскімі патрабаваннямі. Як новы ўласнік, Soven 1 забяспечыць бясшвоўны пераход для кліентаў “Прыёрбанка” і прадаставіць магчымасць працягваць карыстацца звыклымі банкаўскімі сервісамі на працягу ўсяго працэсу”, — гаворыцца ў рэлізе.

14 лютага гэтага года паведамлялася, што бакі знаходзяцца ў “прасунутай фазе” перамоваў з нагоды продажу акцый, якая можа прывесці да сыходу RBI з беларускага рынку.

Адзначалася, што страты групы RBI ў выніку здзелкі складуць каля 225 млн еўра ў сувязі з розніцай у цане пакупкі і балансавага кошту капіталу “Прыёрбанк” ААТ.

Пра тое, што Raiffeisenbank International вядзе перамовы з Soven 1 Holding Limited аб продажы 87,74% акцый ААТ “Прыёрбанк” і яго даччыных кампаній і выхадзе з беларускага рынку, паведаміла 14 лютага мінулага года выданне MarketWatch са спасылкай на заяву банкаўскай групы.

5 траўня 2023 года група Raiffeisen Bank International абвясціла, што закрыла карэспандэнцкія рахункі ўсім расійскім банкам, за выключэннем сваёй даччынай структуры ў РФ Raiffeisenbank Russia.

15 траўня “Прыёрбанк” закрыў карэспандэнцкі рахунак у амерыканскім Citibank у доларах ЗША. Гэта закранула аперацыі юрыдычных асоб, якія выкарыстоўвалі дадзены банк для валютных плацяжоў.

19 траўня кіраўнік прэс-службы RBI Інгрыд Дзіц пацвердзіла “Позірку“ інфармацыю аб скарачэнні кампаніяй карэспандэнцкіх адносін у Беларусі.

11 красавіка 2023 года ўрад Канады пашырыў санкцыі супраць Беларусі, дадаўшы ў спіс дзевяць устаноў фінансавага сектара, у тым ліку “Прыёрбанк”. У сувязі з гэтым банк спыніў прыём плацежных даручэнняў у адрас канадскіх банкаў.

ААТ “Прыёрбанк” створана 20 студзеня 1989 года, зарэгістравана 12 ліпеня 1991-га. Памер статутнага фонду, паводле даных на сайце банка, складае 86 млн 147 тыс. 908,7 рубля. Асноўным акцыянерам з’яўляецца Raiffeisen CIS Region Holding GmbH (Аўстрыя), якому належыць 87,74% акцый.

Увосень 2023 года Нацыянальны банк Беларусі ўключыў “Прыёрбанк” у першую групу сістэмна значных банкаў на 2024 год.