Анулявана рашэнне аб дэпартацыі мастака-акцыяніста Кузьміча ў Беларусь

15 жніўня, Позірк. Рашэнне аб дэпартацыі мастака-акцыяніста Аляксея Кузьміча ў Беларусь анулявана, паведамляецца на яго старонцы ў “Фэйсбуку”.

Удакладняецца, што рашэнне прыняў Мелунскі адміністрацыйны суд 14 жніўня, гэта было чацвёртае судовае пасяджэнне з удзелам мастака.

“Разам з тым на волю ён не выйшаў. Яго зноў завязалі поясам, закавалі ў кайданкі і павезлі ў аўтазаку ў дэпартацыйны цэнтр. Цяпер вырашаецца, куды ён будзе вывезены. На судзе была выказаная здагадка, што Кузьміч можа быць дэпартаваны ў Расію”, — сцвярджаецца ў паведамленні.

Адзначаецца, што Кузьміч дзявяты дзень трымае галадоўку, на судзе яго абараняюць тры адвакаты.

2 жніўня суд Пантуаза (прыгарад Парыжа) пастанавіў дэпартаваць Кузьміча ў Беларусь. Таксама яго аштрафавалі на 3 тыс. еўра і асудзілі на месяц умоўнага зняволення. 7 жніўня ён абвясціў галадоўку.

Зараз Кузьміч утрымліваецца ў дэпартацыйным цэнтры. Пра ягоны арышт са спасылкай на свае крыніцы 1 жніўня паведаміў партал “Люстэрка”. Кузьміч быў затрыманы падчас перформансу-ён раскопваў магілу нідэрландскага мастака Вінцэнта Ван Гога на муніцыпальных могілках у французскім горадзе Авэр-сюр-Уаз.

У лютым 2024 года Кузьміч быў эвакуіраваны з Беларусі фондам салідарнасці BySоl, пасля таго як прыехаў у краіну ў сувязі са смерцю бабулі. Як мяркуецца, на яго заведзеная крымінальная справа.