ДПК: За тыдзень па бязвізе Беларусь наведала 5.687 чалавек, у тым ліку 900 грамадзян краін з пашыранага спісу

19 жніўня, Позірк. З 12 па 18 жніўня Беларусь у бязвізавым парадку наведала 5.687 жыхароў краін Еўропы, паведамляе прэс-служба Дзяржаўнага пагранічнага камітэта (тыднем раней 5.449).

Каля 900 замежнікаў прадстаўляюць краіны з “пашыранага спісу”. Паводле звестак ДПК, у параўнанні з папярэднім тыднем іх колькасць павялічылася прыкладна на 100. Большасць з іх грамадзяне Германіі і Эстоніі — 38% і 21% адпаведна.

Адзначаецца, што агулам з пачатку дзеяння бязвізавага рэжыму ў Беларусь прыбыла 943.524 замежнікі. Разбіўку па краінах ДПК не дае.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. Аляксандр Лукашэнка некалькі разоў падаўжаў яго тэрмін, апошні раз — да канца 2024 года.

19 ліпеня беларускія ўлады распаўсюдзілі бязвізавы рэжым на грамадзян яшчэ 35 краін Еўропы. Большасць з іх рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.

Згодна з апублікаванай 17 ліпеня заявай Міністэрства замежных спраў, гаворка пра жыхароў Аўстрыі, Андоры, Балгарыі, Бельгіі, Босніі і Герцагавіны, Ватыкана, Венгрыі, Вялікабрытаніі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нарвегіі, Нідэрландаў, Партугаліі, Паўночнай Македоніі, Румыніі, Сан-Марына, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Яны могуць уязджаць у Беларусь без візы праз усе наземныя і паветраныя міжнародныя пункты пропуску “паводле сапраўдных дакументаў”, знаходзіцца на беларускай тэрыторыі “не больш за 30 дзён з дня ўезду”.