Праца КДБ уплывае на прыняцце “найважнейшых палітычных рашэнняў” у Беларусі — Лукашэнка

20 снежня, Позірк. Супрацоўнікі Камітэта дзяржаўнай бяспекі “змагаюцца на схаваным ад вачэй людзей фронце, ва ўмовах новых гібрыдных пагроз нацыянальнай бяспецы, беспрэцэдэнтных па сваім маштабе”, з такім сцвярджэннем выступіў Аляксандр Лукашэнка, віншуючы 20 снежня асабовы склад і ветэранаў КДБ з прафесійным святам.

“Вынікі вашай працы садзейнічаюць прыняццю найважнейшых палітычных рашэнняў, шмат у чым вызначаючы будучыню Радзімы, а значыць, і лёсы мільёнаў грамадзян, — прыводзіць тэкст паслання прэс-служба віншавальніка. — Дзякую кожнаму з вас за высокі прафесіяналізм, бездакорны стыль працы і поўную самааддачу. Перакананы, што, адказваючы на выклікі часу, вы зробіце ўсё, каб узмацніць пазіцыі краіны ў зменлівым светапарадку, захаваўшы на роднай зямлі мір і стабільнасць”.

Паводле сцвярджэння Лукашэнкі, “з першых дзён стварэння спецслужбы чэкісты знаходзіліся ў авангардзе абароны дзяржавы, адстойваючы яе суверэнітэт і незалежнасць, у барацьбе з ворагам праяўлялі выключную трываласць, рашучасць і мужнасць, паказваючы прыклад сапраўднага патрыятызму”.

Ад пачатку праўлення Лукашэнкі КДБ, як і яго аднайменны папярэднік у СССР, сярод іншага займаецца палітычна матываваным пераследам нелаяльных рэжыму грамадзян. У тым ліку гэтая структура адказная за напаўненне спісаў “тэрарыстаў” і “экстрэмісцкіх фарміраванняў” імёнамі і назвамі тых, хто не ідзе ў фарватары дзейнага рэжыму.

Пасля сфальсіфікаваных прэзідэнцкіх выбараў 2020 года Беларусь знаходзіцца ў найглыбокім грамадска-палітычным крызісе, не спыняюцца рэпрэсіі небывалага маштабу. Парушэнні правоў чалавека, прымусовая пасадка замежнага пасажырскага самалёта, арганізацыя міграцыйнага крызісу, а таксама дапамога Расіі ў яе ваеннай агрэсіі супраць Украіны фактычна ізалявалі Беларусь пад кіраваннем рэжыму Лукашэнкі ад дэмакратычнага свету і дазволілі Расіі ўмацаваць свой уплыў на яе.