Польшча заявіла аб памяншэнні на 70% колькасці спробаў нелегальнага пераходу мяжы з боку Беларусі

22 жніўня, Позірк. За 70 дзён працы буфернай зоны на мяжы з Беларуссю колькасць спробаў нелегальнага пранікнення на тэрыторыю Польшчы скарацілася амаль на 70%, паведамляе прэс-служба ўрада гэтай дзяржавы.

З 13 чэрвеня гэтага года зафіксавана 4.276 такіх спробаў, а з 5 красавіка да 12 чэрвеня — больш за 13.675, гаворыцца ў паведамленні. З пачатку дзеяння буфернай зоны затрымана 230 кур’ераў, якія незаконна перапраўлялі мігрантаў.

Паводле даных урада, з 13 чэрвеня ў забеспячэнні бяспекі мяжы Польшчы з Беларуссю задзейнічана больш за 17 тыс. паліцэйскіх, каля 5,5 тыс. салдат. У аперацыі “Бяспечнае Падляшша” з 1 жніўня вахтавым метадам прынялі ўдзел 17 тыс. чалавек.

У буфернай зоне нельга знаходзіцца без спецдазволу. На 21 жніўня Памежная ахова Польшчы выдала 148 такіх дакументаў, у тым ліку 97 сродкам масавай інфармацыі.

Буферная зона дзейнічае з 13 чэрвеня гэтага года, уведзеная на 90 дзён прыкладна на 60 км польска-беларускай мяжы ў Падляскім ваяводстве.

На працягу больш за 40 км забаронена знаходзіцца ў паласе шырынёй 200 метраў ад лініі мяжы, на працягу 16 км паласа мае шырыню прыкладна 2 км. У забароненую зону не ўваходзяць гарады і турыстычныя сцежкі.

Таксама на мяжы з Беларуссю працягласцю 186 км усталяваны сталёвы бар’ер вышынёй 5,5 м, пабудаваны ў 2022 годзе. Яго дапаўняе так званы электронны бар’ер — сістэма камер і датчыкаў.

6 чэрвеня памёр польскі вайсковец 1-й танкавай брыгады Матэвуш Сітэк, паранены нажом 28 траўня на мяжы з Беларуссю. Паводле інфармацыі Памежнай аховы Польшчы, вайсковец зазнаў напад мігранта, які ў складзе вялікай групы спрабаваў незаконна перасекчы мяжу з беларускай тэрыторыі.

Пытанне поўнага закрыцця мяжы з Беларуссю “датычыцца двухбаковых адносін паміж краінамі”, польскі бок чакае ад Мінска супрацоўніцтва па раней агучаных патрабаваннях: спыненне міграцыйнага крызісу, вызваленне асуджанага да 8 гадоў зняволення журналіста Анджэя Пачобута і выдача забойцы сяржанта Сітэка, заявіў у сярэдзіне жніўня міністр унутраных спраў і адміністрацыі Польшчы Томаш Семоняк.

17 ліпеня Семоняк адзначыў, што, “калі Беларусь вызваліць Пачобута, пачне супрацоўнічаць з Польшчай па пытанні забойцы сяржанта Сітэка і перастане спрыяць ціску на мяжы, то, несумненна, з’явяцца сігналы, якія дазволяць больш прагматычна выбудоўваць адносіны з польскага боку”.

Днём пазней аналагічныя ўмовы разрадкі двухбаковых адносін абвясціла МЗС Польшчы.

Не менш за 116 нелегальных мігрантаў, у тым ліку 15 жанчын, памерла на мяжы Беларусі з краінамі ЕС за тры гады — з вясны 2021-га па канец сакавіка 2024-га, вынікае з дакладу “Бяспечнага шляху няма. Смерці мігрант_ак на мяжы Еўрапейскага саюза і Беларусі” праваабарончай арганізацыі Human Constanta.