Польшча чакае ад Мінска “першага рэальнага кроку” для разрадкі адносін
18 ліпеня, Позірк. Варшава чакае ад Беларусі “першага рэальнага кроку” для разрадкі двухбаковых адносін, заявіў прэс-сакратар МЗС Польшчы Павел Вроньскі.
Ён паўтарыў вылучаныя Мінску ўмовы: спыненне “гібрыдных нападаў на мяжы” і выдача “забойцы польскага вайскоўца”.
У сітуацыі з мігрантамі, паводле слоў Вроньскага, “ёсць пэўны прагрэс”, бо прыток нелегалаў “апошнім часам знізіўся”.
Адносна перадачы Варшаве вінаватага ў гібелі вайскоўца прадстаўнік МЗС падкрэсліў: “Ёсць прыкметы таго, што гэты злачынец вядомы беларускаму боку”.
Вроньскі таксама падкрэсліў, што ўладам у Мінску “вядомая і пазіцыя Польшчы ў дачыненні да палітвязняў у Беларусі, у тым ліку [журналіста] Анджэя Пачобута”.
“Калі Беларусь вызваліць Анджэя Пачобута, пачне супрацоўнічаць з Польшчай у пытанні забойцы сяржанта Матэвуша Сітэка і перастане спрыяць ціску на мяжы, то, несумненна, з’явяцца сігналы, якія дазволяць больш прагматычна выбудоўваць адносіны з польскага боку”, — заявіў 17 ліпеня міністр унутраных спраў і адміністрацыі Польшчы Томаш Семоняк.
3 ліпеня міністр замежных спраў Польшчы Радаслаў Сікорскі заявіў, што Беларусь “дасылае сотні мігрантаў з расійскімі візамі”, фактычна ўручную кантралюючы колькасць тых, хто спрабуе перайсці мяжу нелегальна.
Бываюць месяцы, “калі колькасць мігрантаў раўняецца нулю”, а бывае, што мяжу спрабуе перайсці “300–400 чалавек у дзень”, сказаў ён.
Толькі ад Мінска залежыць, якімі будуць яго добрасуседскія адносіны з Польшчай, падкрэсліў Сікорскі ў кантэксце магчымага закрыцця Варшавай мяжы з Беларуссю. “Нашы базавыя патрабаванні — каб на волю выйшаў Анджэй Пачобут і спынілася сілавая перакідка мігрантаў”, — дадаў міністр.
2 ліпеня Аляксандр Лукашэнка, выступаючы на ўрачыстым сходзе, прысвечаным Дню незалежнасці, у чарговы раз заявіў, што нелегальныя мігранты ідуць у ЕС, таму што іх туды “паклікалі”, у Беларусі іх “лавіць не будуць”.
6 чэрвеня стала вядома пра смерць польскага вайскоўца 1-й танкавай брыгады Матэвуша Сітэка, параненага нажом 28 траўня на мяжы з Беларуссю. Паводле інфармацыі Памежнай аховы Польшчы, вайсковец зазнаў напад мігранта, які ў складзе вялікай групы спрабаваў незаконна перасекчы мяжу з боку Беларусі.
13 чэрвеня на польска-беларускай мяжы пачала дзейнічаць буферная зона, пакуль тэрмін вызначаны ў 90 дзён.
З вясны 2021 года на мяжы Беларусі і Еўрасаюзу працягваецца міграцыйны крызіс, які ўлады Польшчы і краін Балтыі называюць “гібрыднай атакай”, арганізаванай рэжымамі ў Мінску і Маскве.
Рыжанкоў: Шантаж з нагоды транзіту кітайскіх тавараў у палякаў не атрымаўся, як бы яны ні харахорыліся
18 ліпеня, Позірк. "Польшча ніколі не будзе дзейнічаць на шкоду сваім інтарэсам. Тое, што яны робяць сёння, азначае толькі адно: іх інтарэсам на сённяшні момант гэта адпавядае. Значыць нейкія палітычныя рэчы ў Польшчы ёсць, якія дапускаюць такое стаўленне да Беларусі", …