З пачатку года суды Брэсцкай вобласці задаволілі 65 пазоваў аб спагнанні сродкаў, затрачаных на навучанне

22 жніўня, Позірк. З пачатку года суды Брэсцкай вобласці задаволілі 65 пазоваў пракуратуры на агульную суму 620 тыс. рублёў аб спагнанні з выпускнікоў сродкаў, затрачаных на навучанне, паведамляе прэс-служба нагляднага ведамства.

Гаворка аб спагнанні сродкаў з выпускнікоў вышэйшых і сярэдніх спецыяльных устаноў адукацыі, якія навучаліся за кошт рэспубліканскага і мясцовых бюджэтаў і не адпрацавалі ўстаноўлены законам тэрмін па размеркаванні.

Пракуратура прыводзіць прыклады, якія тычацца выпускнікоў сельскагаспадарчых ВНУ, якія не прыступілі да працы па размеркаванні і выплацілі паводле рашэння суда 40–41 тыс. рублёў.

На практыцы судовыя рашэнні гэтай катэгорыі, якія ўступілі ў сілу, рэдка выконваліся ў добраахвотным парадку. Кампетэнтныя органы ініцыявалі іх прымусовае выкананне, адзначае пракуратура.

Паводле даных Мінадукацыі, у 2023 годзе было размеркавана 55 тыс. выпускнікоў вышэйшых, сярэдніх спецыяльных устаноў і ўстаноў прафесійнай адукацыі, якія навучаліся за кошт бюджэту.

Пры паступленні на працу яны набылі статус маладога спецыяліста, які дае права на адпачынак пасля заканчэння навучання, грашовую дапамогу ў памеры стыпендыі, першачарговае атрыманне арэнднага жылля з камунальнага жыллёвага фонду. Акрамя таго, прадугледжаная частковая грашовая кампенсацыя за арэнду жылля, калі выпускнік адпраўляецца па размеркаванні ў населены пункт, дзе не мае месца пражывання.

Таксама абмежаваныя магчымасці наймальніка звольніць маладога спецыяліста, перавесці яго на працу, не звязаную з атрыманай спецыяльнасцю.

На нарадзе ў Аляксандра Лукашэнкі 21 верасня 2023 года міністр адукацыі Андрэй Іванец анансаваў змены ў Кодэкс аб адукацыі — для выпускнікоў ВНУ, якія вучыліся платна, планавалася ўвесці адпрацоўку па размеркаванні, а для выпускнікоў бюджэтных аддзяленняў яе тэрмін павялічыць.

5 кастрычніка 2023 года Іванец заявіў, што платнікаў, якія ўжо навучаюцца, у абавязковым парадку размяркоўваць не будуць.

На сёння адпрацоўка па размеркаванні абавязковая толькі для выпускнікоў, якія навучаліся за кошт бюджэту. Тыя, хто навучаецца па мэтавым накіраванні, абавязаны адпрацаваць па размеркаванні пяць і больш гадоў (у залежнасці ад тэрміну, прапісанага ў дамове аб падрыхтоўцы спецыяліста), астатнія бюджэтнікі — два гады.