Вядомыя імёны 15 палітвязняў, якія выйшлі на волю па памілаванні

26 жніўня, Позірк. Вядомы імёны 15 палітзняволеных, вызваленых па памілаванні пасля падпісання адпаведнага ўказа.

Увечары 25 жніўня тэлеканал ОНТ паказаў у эфіры траіх вызваленых: Руслана Красава (у канцы 2022 года асуджаны паводле ч. 2 арт. 368 КК (абраза прэзідэнта) і ч. 2 арт. 367 КК (паклёп у дачыненні да прэзідэнта) да трох гадоў пазбаўлення волі), Аляксандра Галузу (асуджаны ў жніўні 2023 года паводле ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) і ч. 1 арт. 130 (распальванне расавай, нацыянальнай, рэлігійнай) або іншай сацыяльнай варожасці або варажнечы), Алега Зыкуна (засуджаны на 1 год 6 месяцаў паводле ч. 3 арт. 203¹ (незаконныя дзеянні ў дачыненні да інфармацыі аб прыватным жыцці і персанальных даных) у верасні 2023 года).

Інфармацыі аб іх памілаванні раней не было.

Праваабаронцам на вечар 25 жніўня вядома пра 22 палітвязні, якія выйшлі на волю па памілаванні. Апублічваліся імёны 12 з іх. Гэта Ксенія Луцкіна, Ірына Санкоўская, Васіль Бераснёў, Наталля Пятровіч, Вольга Новікава, Ала Зуева, Вольга Страбоўская, Кацярына Леў, Тамара Каравай, Святлана Паўэктава, Яўген Чуміла, Павел Кучынскі.

16 жніўня Аляксандр Лукашэнка падпісаў указ аб памілаванні 30 асоб, асуджаных за злачынствы “пратэстнай накіраванасці”.

У ліку памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.