Сувязі паміж Беларуссю і Кыргызстанам будуць “няўхільна мацнець”, заяўляе Лукашэнка
31 жніўня, Позірк. “Дружалюбныя сувязі” паміж Беларуссю і Кыргызстанам будуць “няўхільна мацнець”, а “практычнае ўзаемадзеянне — напаўняцца новымі праектамі”, заявіў Аляксандр Лукашэнка, віншуючы 31 жніўня прэзідэнта гэтай сярэднеазіяцкай краіны Садыра Жапарава з Днём незалежнасці.
“Гэтае свята сімвалізуе адзінства народа, які прайшоў доўгі шлях станаўлення дзяржаўнасці. За гады суверэнітэту Мінск і Бішкек здолелі не толькі беражліва захаваць агульную гістарычную спадчыну, але і пашырыць кантакты па многіх напрамках”, — цытуе Лукашэнку яго прэс-служба.
“Наглядным пацвярджэннем высокага ўзроўню беларуска-кыргызскіх адносін” віншавальнік назваў “паспяховае супрацоўніцтва дзвюх краін у рэгіянальных арганізацыях”.
“У гэтым мы яшчэ раз пераканаліся пры ўступленні ў ШАС, атрымаўшы важную падтрымку Бішкека”, — падкрэсліў Лукашэнка.
Мінску і Бішкеку трэба “ўзмацняць рэгіянальнае супрацоўніцтва” па прыкладзе ўзаемадзеяння Беларусі і Расіі, заявіў Лукашэнка 5 кастрычніка мінулага года ў Мінску на сустрэчы са спікерам парламента Кыргызстана Нурланбекам Шакіевым.
“Хацелася б, каб гэты вопыт быў перанесены і на беларуска-кыргызскія адносіны. Тым больш што гэта ў нас у поле зроку парламента”, — сказаў ён.
Паводле яго слоў, беларускія ўлады гатовыя “ўсяляк спрыяць таму, каб Кыргызстан не быў нейкай там краінай у куце і наводшыбе”. У гэтай краіне, перакананы Лукашэнка, жыве “вельмі актыўная, вельмі прасунутая” нацыя.
“У нас вельмі добрыя ўзаемаадносіны па ўсіх лініях. І на ўзроўні прэзідэнтаў, і на ўзроўні ўрада. <…> Я добра ведаю кыргызаў — гэта людзі вельмі разумныя. Таму мы знойдзем новыя агульныя пункты судакранання. У гэтым кірунку мы будзем з вамі працаваць, калі ў вас да гэтага будзе цікавасць”, — заявіў ён.
Пры гэтым афіцыйны Мінск ігнаруе запыты кыргызскай генпракуратуры аб выдачы былога прэзідэнта Кыргызстана Курманбека Бакіева, які атрымаў палітычны прытулак у Беларусі ў 2010 годзе, завочна прыгаворанага на радзіме ўжо да некалькіх доўгіх тэрмінаў пазбаўлення волі па справах, звязаных з карупцыяй.
Беларусь і Кыргызстан з’яўляюцца партнёрамі ў рамках Еўразійскага эканамічнага саюза і Садружнасці Незалежных Дзяржаў, а таксама саюзнікамі ў Арганізацыі Дагавора аб калектыўнай бяспецы.
У канцы жніўня 2023 года дзяржаўныя СМІ паведамлялі, што па выніках 2022 года тавараабарот паміж Беларуссю і Кыргызстанам перавысіў 160 млн долараў.
Паводле даных МЗС, тавараабарот Беларусі з Кыргызстанам у 2021 годзе склаў 97,1 млн долараў (беларускі экспарт — 86,2 млн).