Урад зацвердзіў пералік відаў рамеснай дзейнасці

3 верасня, Позірк. Бондарства, выраб пражы, кавальская справа, мастацкая апрацоўка і роспіс вырабаў з матэрыялаў спажыўца, а таксама выраб і рамонт шэрага прадметаў аднесеныя да відаў рамеснай дзейнасці ў адпаведнасці з пастановай Савета міністраў № 637 ад 30 жніўня.

Згодна з дакументам, апублікаваным 3 верасня на Нацыянальным прававым інтэрнэт-партале, мастацкая апрацоўка і роспіс лічацца рамеснай дзейнасцю, калі вырабы робяцца з дрэва, каменя, косці, скуры, рога, металу, бляхі, шкла, керамікі або фанеры.

Рамеснікамі прызнаюцца людзі, якія займаюцца вырабам і рамонтам:

• глазураванай і неглазураванай пячной кафлі, дэкаратыўнай кафлі і пано-уставак, кафляных карнізаў з прыроднай гліны метадамі ручнога набівання або залівання ў гіпсавыя формы, прасавання, ручной апраўкі, дэкарыравання, глазуроўкі;
• конных вазоў, саней і дзіцячых санак;
• вырабаў, выкананых у лапікавай тэхніцы;
• вырабаў ручнога ткацтва, вязання, вышыўкі, валення, карункапляцення, макрамэ, пляцення бісерам;
• кухоннага інвентару, цацак, інтэр’ерных лялек, дэкаратыўных пано, шкатулак, партсігараў, табакерак, попельніц, скарбонак, падсвечнікаў, дэталяў і прадметаў упрыгожвання мэблі, бірулек, ключніц, біжутэрыі, бранзалетаў, упрыгожванняў для валасоў, грабянёў, статуэтак, ваз, гаршкоў і кашпо для кветак, такарных фігурных вырабаў, велікодных яек-маляванак, сувеніраў (у тым ліку на магнітнай аснове), ёлачных цацак;
• нацыянальнага беларускага строю (яго дэталяў) з захаваннем традыцыйнага крою і вышыўкі;
• нацыянальных музычных інструментаў;
• прадметаў (іх частак) з дроту, шпагату, сінтэтычнай стужкі, бляхі, гліны, раслінных матэрыялаў мясцовага паходжання, у тым ліку з дрэва, мастацкіх вырабаў з паперы і пап’е-машэ;
• шорна-седлавых вырабаў;
• традыцыйных нацыянальных прылад лоўлі рыбы.

Урад зацвердзіў формы заявы аб прымяненні збору за ажыццяўленне рамеснай дзейнасці, апавяшчэння аб спыненні прымянення гэтага збору ў добраахвотным парадку, аб страце падставы для яго прымянення, а таксама аб спыненні ажыццяўлення рамеснай дзейнасці.

21 жніўня Аляксандр Лукашэнка падпісаў указ “Аб ажыццяўленні фізічнымі асобамі рамеснай дзейнасці”.

Ім была ўведзена, у прыватнасці, забарона на выкарыстанне ў рамеснай дзейнасці прамысловых машын і абсталявання.

Не дапушчаецца выкарыстанне біўняў ці іклоў слана, бегемота, маржа, нарвала і кабана, рога насарога, зубоў усіх жывёл, а таксама каштоўных металаў і каштоўных камянёў.

“У залежнасці ад рэжыму падаткаабкладання ажыццяўленне рамеснай дзейнасці будзе магчымае пры выплаце падатку на прафесійны прыбытак або рамеснага збору. Да падстаў для прыняцця мясцовымі органамі рашэння аб выплаце фізічнай асобай рамеснага збору ўказам аднесены наяўнасць статусу народнага майстра, членства ў Беларускім саюзе майстроў народнай творчасці, праца на пасадзе майстра народных промыслаў (рамёстваў), атрыманне пенсіі па ўзросту або за выслугу гадоў, інваліднасць I або ІІ групы, пражыванне ў маланаселеным пункце (да 50 чалавек)”, — адзначалася ў каментарыі да ўказа.

Рамеснікам дадзеная магчымасць збыту вырабаў на арандаваных плошчах у гандлёвых і іншых аб’ектах, гандлёвых цэнтрах, у інтэрнэце, а таксама праз юрыдычныя асобы і індывідуальных прадпрымальнікаў на падставе грамадзянска-прававых дагавораў.

У каментарыі сцвярджалася, што “навацыі ўказа” будуць садзейнічаць “развіццю рамесніцтва на аснове нацыянальных традыцый і перадачы наступным пакаленням культурнай спадчыны Беларусі”.