У Гомельскай вобласці 19 верасня будуць гучаць сірэны

18 верасня, Позірк. “Тэхнічная праверка электрасірэннага абсталявання з запускам электрасірэн” чакаецца 19 верасня на тэрыторыі Гомельскай вобласці, вынікае з паведамлення Міністэрства па надзвычайных сітуацыях.

Ведамства папрасіла жыхароў “з разуменнем паставіцца да правядзення падобных мерапрыемстваў” і заклікала захоўваць спакой, дадаўшы, што ніякіх дзеянняў рабіць не трэба.

Падчас паездкі ў Магілёўскую вобласць 20 ліпеня кіраўнік Адміністрацыі прэзідэнта Дзмітрый Круты заявіў, што перад МНС стаіць задача “ў корані памяняць сістэму апавяшчэння”. У прыватнасці, на яго думку, sms-рассыланні з папярэджаннямі “выклікаюць у грамадзян усмешку”, “гэтая сістэма неэфектыўная”.

У ліпені, жніўні і верасні рэсурсы, што спецыялізуюцца на маніторынгу ваеннай сітуацыі, паведамлялі пра мноства выпадкаў уварвання ў паветраную прастору Беларусі беспілотнікаў, якімі Расія атакуе Украіну.

У ноч на 5 верасня некалькі дронаў былі збітыя над Гомелем, абломкі аднаго з іх упалі на будынак склада, ніхто не пацярпеў. Мінабароны было вымушанае прызнаць факт парушэння мяжы лятальнымі аб’ектамі, але не назвала, каму яны належылі.

Пры гэтым ані разу не паведамлялася, каб у раёнах уварвання беспілотнікаў спрацоўвалі сірэны.