Латушка: Мы ўпэўненыя, што будзе выдадзены ордар на арышт Лукашэнкі
30 верасня, Позірк. Накіраванне Літвой у Міжнародны крымінальны суд матэрыялаў пра “трансгранічныя злачынствы супраць чалавечнасці, здзейсненыя Аляксандрам Лукашэнкам і яго саўдзельнікамі ў дачыненні да беларусаў”, з’яўляецца “архіважным рашэннем”, такое меркаванне выказаў у відэазвароце 30 верасня намеснік кіраўніцы Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.
“Мы ўпэўненыя ў тым, што ў выніку гэта прывядзе да ордара на арышт Лукашэнкі <…>. Нам важная падтрымка як мага большай колькасці краін, каб адказнасць надышла як мага раней”, — падкрэсліў ён.
За гады свайго кіравання, паводле слоў Латушкі, Лукашэнка “сфармаваў дзяржаўную машыну масавых рэпрэсій”, у гэтым заключаецца “яго дзяржаўная палітыка — палітыка пераследу, дыскрымінацыі нязгодных, чысткі грамадства”.
Палітыку рэжыму фармуюць і рэалізуюць многія людзі, адзначыў ён, згадаўшы кіраўнікоў сілавых ведамстваў, чыноўнікаў і прапагандыстаў. “Гэтыя асобы паўстануць перад судом”, — перакананы палітык.
Многія беларусы, на думку намесніка кіраўніцы АПК, хацелі б бачыць Лукашэнку на лаве падсудных у Беларусі: “Каб ішла жывая трансляцыя, каб усе мы з вамі маглі на свае вочы бачыць яго, а таксама яго саўдзельнікаў у гэтай клетцы”.
Сёння “гэта нерэальна”, прызнаў Латушка, у той жа час адзначыўшы, што ў гэтай сітуацыі рэальна выкарыстаць міжнародныя інструменты. Паводле яго слоў, злачынствы рэжыму Лукашэнкі не спыняцца і дэмакратыя ў Беларусі не пераможа, “калі не наступіць адказнасць”.
Пра тое, што ўрад Літвы перадаў у офіс пракурора МУС матэрыялы пра “трансгранічныя злачынствы супраць чалавечнасці, здзейсненыя Аляксандрам Лукашэнкам і яго саўдзельнікамі ў дачыненні да беларусаў”, стала вядома 30 верасня. Матэрыялы перададзеныя на просьбу і на падставе дакументаў, падрыхтаваных НАУ.
Урад Літвы зрабіў гэта, бо “больш не можа сядзець склаўшы рукі”.
Беларускія дэмакратычныя сілы заклікалі краіны, якія ратыфікавалі Рымскі статут, падтрымаць намаганні Літвы па прыцягненні Лукашэнкі да адказнасці ў МУС.
У каментарыі пракурора МУС Карыма Хана, апублікаваным 30 верасня на сайце суда, гаворыцца, што перадача дзяржавай — удзельніцай Рымскага статута заявы ў Міжнародны крымінальны суд не прыводзіць аўтаматычна да пачатку расследавання.
“Я магу пацвердзіць, што мой офіс правядзе папярэдняе расследаванне для вывучэння запыту ў рамках юрысдыкцыі МУС і вызначыць на аснове вызначаных законам патрабаванняў, ці маюцца разумныя падставы для пачатку расследавання”, — гаворыцца ў каментарыі.
Любая зацікаўленая асоба або арганізацыя, якія жадаюць прадставіць інфармацыю пра гэтыя або іншыя меркаваныя злачынствы, могуць выкарыстаць адмысловую абароненую платформу на сайце МУС, падкрэсліў Хан.
