У Беларусі пачынаецца кампанія па вакцынацыі супраць грыпу

3 кастрычніка, Позірк. У Беларусі пачынаецца кампанія па вакцынацыі супраць грыпу, паведаміла 3 кастрычніка прэс-служба Міністэрства аховы здароўя.

Паводле інфармацыі ведамства, імунізацыяй супраць грыпу плануецца забяспечыць больш за 2 млн. чалавек.

Вакцынацыя за сродкі бюджэту будзе праводзіцца прэпаратам “Грыпол Плюс” (вырабляе расійскае НВА “Петровакс Фарм”). Гэтая трохкампанентная вакцына выкарыстоўваецца ў Беларусі з 2015 года.

Трохвалентныя вакцыны ўключаюць у свой склад штамы трох вірусаў сезоннага грыпу: пандэмічнага A (H1N1), A (H3N2) і віруса грыпу В, чатырохвалентныя ўтрымліваюць два штамы віруса з групы В.

Чатырохвалентныя вакцыны “Ваксігрып Тэтра” (Францыя) выкарыстоўваюцца ў прыватных медцэнтрах для вакцынацыі на платнай аснове.

Мінздароўя адзначае, што вакцынацыя — “просты, бяспечны, эфектыўны” спосаб абароны ад інфекцыі, які “дазваляе сфармаваць індывідуальную абарону, прадухіліць узнікненне захворвання і яго цяжкі ход”, у выпадку, калі чалавек захварэе.

На прэс-канферэнцыі 24 верасня медыцынскія спецыялісты заявілі, што ў Беларусі назіраецца “заканамерны ўздым” захваральнасці на вострыя рэспіраторныя інфекцыі.

Паводле даных медыкаў, на долю рэспіраторных інфекцый прыпадае больш за 98% усяго інфекцыйнай захваральнасці ў краіне. Рост колькасці хворых яны звязваюць з надыходам восеньскага перыяду, фармаваннем новых дзіцячых калектываў, пачаткам навучальнага працэсу, заканчэннем сезону адпачынкаў і вяртаннем дарослага насельніцтва ў працоўныя калектывы.