У Беларусі будуць судзіць расіянку, якая спрабавала незаконна ўвезці ў Літву 44 тыс. долараў

3 кастрычніка, Позірк. Гродзенская транспартная пракуратура накіравала ў суд Ашмянскага раёна крымінальную справу ў дачыненні да грамадзянкі Расіі, якой інкрымінавана “незаконнае перамяшчэнне праз мытную мяжу Еўразійскага эканамічнага саюза наяўных грашовых сродкаў”, паведамляе прэс-служба нагляднага ведамства.

Згодна з матэрыяламі справы, абвінавачаная, “едучы ў верасні 2024 года ў якасці пасажыра легкавога аўтамабіля, пры выездзе з Беларусі ў Літву не задэкларавала наяўныя грошы ў буйным памеры”. “Падчас мытнага кантролю было ўстаноўлена, што жанчына перамяшчала сродкі ў суме, эквівалентнай 44,5 тыс. долараў, папярэдне падзяліўшы дадзеную суму паміж пасажырамі аўтамабіля, якія не ведалі, што здзяйсняецца злачынства”, — адзначае Генпракуратура.

У ведамстве адзначылі, што пасля вывучэння матэрыялаў справы зроблена выснова “аб абгрунтаванасці абвінавачвання” паводле ч. 2 арт. 228 КК (кантрабанда). Паводле гэтага артыкула ў якасці пакарання прадугледжаныя штраф, абмежаванне волі на тэрмін ад двух да пяці гадоў, або пазбаўленне волі на той жа тэрмін.

“Абраную раней у дачыненні да абвінавачанай меру стрымання ў выглядзе закладу гродзенскі транспартны пракурор пакінуў без змены”, — гаворыцца ў паведамленні.

У адпаведнасці з Мытным кодэксам ЕАЭС, дэклараванню падлягаюць тавары для асабістага карыстання, у тым ліку перамешчаныя фізічнымі асобамі праз мытную мяжу ЕАЭС наяўныя грашовыя сродкі і дарожныя чэкі, калі іх агульная сума перавышае суму, эквівалентную 10 тыс. долараў.