Лукашэнка: Пасля распаду СССР Беларусь і Расія зрабілі стаўку на “захаванне і развіццё таго, што было”
9 кастрычніка, Позірк. Стаўку на “захаванне і развіццё таго, што было”, зрабілі Беларусь і Расія пасля распаду СССР, заявіў 9 кастрычніка Аляксандр Лукашэнка на сустрэчы ў Маскве з прэзідэнтам РФ Уладзімірам Пуціным.
Прэс-служба Лукашэнкі паведамляе, што на перамовах бакі абмеркавалі “актуальныя пытанні далейшага развіцця расійска-беларускіх адносін стратэгічнага супрацоўніцтва і саюзніцтва з акцэнтам на інтэграцыйным узаемадзеянні ў рамках Саюзнай дзяржавы”.
“Што тычыцца нашых адносін, самая галоўная выснова, як я мяркую, — Захад паставіў перад сабой планы задушыць нас, перш за ўсё, у эканоміцы, фінансах. Не атрымалася. Яны ўжо самі гэта прызнаюць”, — сказаў Лукашэнка.
Пры гэтым, паводле яго слоў, захаванне савецкай спадчыны дзвюм дзяржавам “спатрэбілася”.
“Сёння мы разам працуем па вельмі многіх напрамках, вырабляем тавары. Яны ў асноўным знаходзяць попыт у Расійскай Федэрацыі. Расія мае патрэбу ў тых таварах, якія мы вырабляем. Ад сельскай гаспадаркі да мікраэлектронікі. Вы правільна пра гэта сказалі”, — адзначыў ён.
Лукашэнка, як заяўляе яго прэс-служба, “падтрымаў тэзіс свайго расійскага калегі аб тым, што свет шалёнымі тэмпамі змяняецца”, у сувязі з гэтым “з’яўляюцца як новыя пагрозы, так і новыя магчымасці”.
“Натуральна, з’яўляюцца пытанні, якія трэба вырашаць. І колькі б мы з вамі ні сустракаліся, заўсёды палова нашых размоў — гэта ўнутраныя справы: дабрабыт беларусаў, расіян. І пытанні бяспекі”, — дадаў Лукашэнка.
Гаворачы аб СНД, Савет кіраўнікоў дзяржаў якога прайшоў у Маскве напярэдадні, ён заявіў, што “ў складзе садружнасці — наймагутныя і найбагацейшыя рэсурсамі краіны”. “Таму гэта можа быць магутным і эфектыўным рэгіянальным аб’яднаннем, калі мы прыкладзем значныя намаганні”, — дадаў Лукашэнка.
Пуцін на сустрэчы акцэнтаваў увагу на развіцці двухбаковых адносін у кантэксце “будаўніцтва Саюзнай дзяржавы”. “Мы часта з вамі сустракаемся, дынаміка значная. Гандлёва-эканамічныя сувязі развіваюцца самым найлепшым чынам, добрымі тэмпамі”, — сказаў прэзідэнт РФ.
Пуцін заявіў аб адкрыцці “новых магчымасцяў” супрацоўніцтва ў сферы авіяцыйнага будаўніцтва, падкрэсліўшы, што “яшчэ з савецкіх часоў Беларусь называлі зборачным цэхам Савецкага Саюза”.
“Дзякуючы вашым намаганням гэтыя перавагі ў галіне эканомікі, прамысловай вытворчасці ў Беларусі захаваліся. Таму ў нас ёсць магчымасць дапаўняць адзін аднаго і рухацца па ўсіх гэтых і некаторых іншых напрамках”, — адзначыў расійскі прэзідэнт.