За тыдзень Беларусь без віз наведала 4,8 тыс. жыхароў краін Еўропы — Дзяржпамежкамітэт

14 кастрычніка, Позірк. З 7 па 14 кастрычніка Беларусь у бязвізавым парадку наведала 4.775 жыхароў 38 краін Еўропы (тыднем раней — 4.231), сведчаць даныя Дзяржаўнага памежнага камітэта.

У краіну прайшло 1.496 грамадзян і неграмадзян Латвіі (1.334), 625 грамадзян Польшчы (579), 1.869 грамадзян Літвы (1.578) і 785 грамадзян з ліку жыхароў іншых еўрапейскіх дзяржаў з пашыранага пераліку (740).

Усяго з 15 красавіка 2022 года Беларусь наведала па бязвізе 980.594 жыхары Еўропы. З Латвіі прыбыло 306.548 замежнікаў, з Літвы — 567.307, з Польшчы — 98.714, а таксама 8.025 грамадзян з 35 краін, уключаных 19 ліпеня бягучага года ў спіс “пашыранага бязвізу”.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. Аляксандр Лукашэнка некалькі разоў падаўжаў яго тэрмін, апошні раз — да канца 2024 года.

19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы. Большасць з іх рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.

Згодна з апублікаванай 17 ліпеня заявай Міністэрства замежных спраў, гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Яны могуць уязджаць у Беларусь без візы праз усе наземныя і паветраныя міжнародныя пункты пропуску “паводле сапраўдных дакументаў”, знаходзіцца на беларускай тэрыторыі “не больш за 30 дзён з дня ўезду”.