Латушка: Пытанне дэмакратызацыі Беларусі нельга адкладаць да перамогі Украіны
15 кастрычніка, Позірк. “Пытанне дэмакратызацыі Беларусі памылкова адкладаць да перамогі Украіны” ў вайне супраць Расіі, заявіў намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення Павел Латушка ў выступе 14 кастрычніка на форуме “Будучыня Беларусі” ў Берліне.
Тым больш нельга адкладаць гэтае пытанне “да дэмакратычных перамен у Расіі”, цытуе Латушку яго прэс-служба.
“Логіка адваротная, — адзначыў палітык. — Дэмакратычныя перамены ў Беларусі і пазбаўленне Расіі магчымасці выкарыстоўваць Беларусь у сваіх мэтах — гэта тое, што шматкроць паскорыць перамогу Украіны”.
На думку палітыка, будучыня Беларусі “неаддзельная ад будучыні Еўропы”.
“Каб гаварыць пра стратэгію, важна дакладна вызначыць яе мэту. На мой погляд, менавіта гэтага сёння не хапае. Прапаную вызначыць мэту: дэмакратычная Беларусь як неад’емная частка еўрапейскай супольнасці і сістэмы рэгіянальнай бяспекі. Дэмакратызацыя Беларусі і бяспека ў Еўропе цесна звязаныя. Дэмакратычная Беларусь, Беларусь без Лукашэнкі апрыёры не можа прадстаўляць небяспеку ні для Украіны, ні для Еўропы”, — удакладніў намеснік кіраўніка АПК.
Стратэгію ў дачыненні да Беларусі, паводле яго слоў, “памылкова будаваць з аглядкай на Расію, засноўваючы яе на састарэлых уяўленнях аб так званых “сферах уплыву”.
“Пытанне да нямецкіх палітыкаў: ці гатовыя яны да публічнага тэзіс — дэмакратызацыя Беларусі роўна скасаванне рэжыму Лукашэнкі? Гэта не павінна быць вашай “чырвонай лініяй”. Дадзеная “чырвоная лінія” ў партнёраў — гэта вынік памылковай стратэгіі, якая доўгі час пераважала ў заходняй палітыцы. Стратэгіі з аглядкай на Расію, заснаванай на састарэлых уяўленнях аб “сферах уплыву”. Мы бачым, да чаго яна прывяла”, — сказаў Латушка.
Палітык, як паведамляецца, прадставіў “шэсць пунктаў, якія важна рэалізаваць” на аснове рэзалюцыі, прынятай Бундэстагам у лістападзе 2023 года.
Гэтымі пунктамі, паводле яго слоў, з’яўляюцца: “непрызнанне Лукашэнкі і яго фальшывых выбараў у 2025 годзе”; сістэмная падтрымка беларускай грамадзянскай супольнасці, незалежных медыя і блогераў; падтрымка “створанай і дзеючай сістэмы палітычных інстытутаў дэмакратычных сіл Беларусі”; узмацненне санкцый; прыцягненне рэжыму Лукашэнкі да крымінальнай адказнасці; недапушчальнасць вызначэння “лёсу Беларусі за спіной у беларускага грамадства”.