Сейм Літвы прыняў да разгляду дэнансацыю дамовы з Беларуссю па барацьбе з мытнымі злачынствамі

15 кастрычніка, Позірк. У Сейме Літвы 15 кастрычніка адбылося галасаванне аб магчымасці разгляду ўнесенага раней законапраекта аб дэнансацыі пагаднення паміж урадамі Літвы і Беларусі аб супрацоўніцтве ў барацьбе з мытнымі злачынствамі.

Паводле інфармацыі Дэпартамента інфармацыі і камунікацыі Сейма, 81 дэпутат са 141 (колькасць тых, хто прыняў удзел у галасаванні, не ўказваецца. — “Позірк”.) прагаласаваў за законапраект. Далей дакумент будзе абмяркоўвацца ў галоўным камітэце па замежных справах Сейма, аднаўленне разгляду гэтага пытання запланавана на 5 лістапада.

Падчас прэзентацыі законапраекта міністр фінансаў балтыйскай дзяржавы Гінтары Скайстэ заявіла, што з пачатку ваеннай агрэсіі Расіі супраць Украіны літоўскія мытныя органы ніяк не супрацоўнічаюць з беларускімі калегамі і не абменьваюцца з імі інфармацыяй.

Аднак, як гаворыцца ў тлумачальнай нататцы да дакумента, у адміністрацыйных спрэчках асобы, якія вядуць гандаль з Мінскам, падаюць мытным органам Літвы і судам дакументы, выдадзеныя мытнымі органамі Беларусі, “у якасці доказу таго, што мытныя працэдуры праведзены належным чынам, гандаль з’яўляецца законным, і што такая дзейнасць не парушае міжнародныя санкцыі, уведзеныя ў адносінах да Беларусі”.

Двухбаковыя пагадненні паміж краінамі на сёння дзейнічаюць “толькі ў абмежаваным аб’ёме”, на практыцы трансгранічнае гандлёва-эканамічнае супрацоўніцтва з Беларуссю поўнасцю прыпынена, дадала міністр.

25 верасня ўрад Літвы ўхваліў падрыхтаваныя Міністэрствам фінансаў праекты прававых актаў аб дэнансацыі пагадненняў аб мытным супрацоўніцтве з Беларуссю і Расіяй.

16 верасня паведамлялася, што прэзідэнт Літвы Гітанас Наўседа ўнёс у Сейм прапанову аб дэнансацыі трох дагавораў з Расіяй і Беларуссю, якія датычацца эканамічнага супрацоўніцтва.

Науседа прапанаваў, як і анансавалася, дэнансаваць дагавор аб заахвочванні і абароне інвестыцый, падпісаны ўрадамі Літвы і Беларусі 5 сакавіка 1999 года ў Мінску, аналагічны дагавор з Расіяй, падпісаны 29 чэрвеня 1999 года ў Маскве, і дагавор аб прадухіленні двайнога падаткаабкладання даходаў і капіталу аб прадухіленні фіскальных парушэнняў, падпісаны з Расіяй у той жа час.

24 верасня Сейм Літвы адобрыў у першым чытанні дэнансацыю гэтых дагавораў.