Дуда занепакоены, што беларусы, якіх пераследуюць, не змогуць атрымаць прытулак, Туск гэта абвяргае
16 кастрычніка, Позірк. У Польшчы ёсць традыцыя падтрымліваць імкненне да свабоды іншых народаў і даваць прытулак людзям, якія змагаюцца за свабоду, але ў адпаведнасці са зменамі, абвешчанымі прэм’ер-міністрам Дональдам Тускам, “многія людзі, якія пераследуюцца рэжымам Лукашэнкі, не змогуць атрымаць прытулак у Польшчы”, заявіў 16 кастрычніка ў Сейме прэзідэнт Польшчы Анджэй Дуда, паведамляе TVN 24.
Дуда адзначыў, што “са здзіўленнем” успрыняў заяву Туска аб часовай адмене прадастаўлення прытулку ў Польшчы. Польскі прэзідэнт назваў гэтае рашэнне “памылкай” і падкрэсліў: “Усё паказвае на тое, што гэта перашкодзіць прадстаўнікам, напрыклад, беларускай палітычнай апазіцыі атрымаць прытулак у Польшчы”.
Ён выказаў надзею на тое, што “Польшча была, ёсць і будзе краінай свабоды і салідарнасці”.
“Давайце скажам шчыра: Пуцін і Лукашэнка спрабуюць дэстабілізаваць сітуацыю на нашай мяжы, у ЕС, а ваш адказ на гэта — пазбавіць прытулку тых, каго Пуцін і Лукашэнка саджаюць у турму і пераследуюць. Я думаю, што гэта нейкая фатальная памылка”, — падкрэсліў кіраўнік польскай дзяржавы.
Туск, адказваючы на словы Дуды, падкрэсліў, што “не было ніводнага выпадку, каб беларускі апазіцыянер спрабаваў нелегальна перасекчы польска-беларускую мяжу ў складзе груп, арганізаваных Лукашэнкам”.
“Сітуацыя на мяжы такая, што арганізаваныя групы, часам падрыхтаваныя беларускімі службамі, за кошт расейскіх і беларускіх грошай і сродкаў кантрабандыстаў дастаўляюцца самалётамі ў Маскву і Менск. Там стаяць аўтобусы, гэтых людзей прывозяць да мяжы, часам рыхтуюць месяцамі, каб яны нелегальна яе перасеклі і правакавалі канфлікты на нашай мяжы”, — патлумачыў прэм’ер-міністр.
Рашэнні ўрада накіраваны не толькі на абарону мяжы з Беларуссю, але і на прадухіленне гібелі людзей, як з боку мігрантаў, так і з боку польскіх салдат і пагранічнікаў, сцвярджае ён.
16 кастрычніка ў інтэрв’ю Gazeta Wyborcza Туск заявіў, што права на прытулак павінна надавацца толькі тым людзям, якія “сапраўды падвяргаюцца пераследам у сваёй краіне, і вяртанне туды пагражае іх жыццю”.
Журналіст пры гэтым прывёў пасведчанне сваёй “сяброўкі з Беларусі”, якая падала прашэнне аб атрыманні з Польшчы міжнароднай абароны — і цяпер, у святле заяў прэм’ера аб узмацненні жорсткасці міграцыйнай палітыкі, асцерагаецца дэпартацыі.
“Калі яна падала заяву аб прадастаўленні прыстанішча, яна будзе разгледжана”, — адказаў на гэта прэм’ер-міністр.
15 кастрычніка Туск паведаміў, што ў Польшчы прынята комплексная міграцыйная стратэгія “Вярніце сабе кантроль. Забяспечыць бяспеку”. Раней ён заяўляў, што гэтая стратэгія прадугледжвае “часовае тэрытарыяльнае прыпыненне права на прытулак”.
Пасля падзеяў 2020 года ў Беларусі Польшча стала адной з ключавых краін, у якія шмат беларусаў уцякло ад рэпрэсій рэжыму Аляксандра Лукашэнкі.
Анджэй Дуда і Дональд Туск знаходзяцца ў супрацьлеглых палітычных сілах Польшчы, супрацьстаянне якіх працягваецца не адны год.
Год таму, 15 кастрычніка 2023 года, у Польшчы прайшлі парламенцкія выбары, у выніку якіх партыя “Закон і справядлівасць” (PiS), да якой належыць Дуда, страціла ўладу пасля двух тэрмінаў кіравання, а кіруючую кааліцыю сфарміравалі “Грамадзянская платформа” (KO, Дональд Туск з’яўляецца яе членам і заснавальнікам), “Новыя левыя”, “Польшча 2050” і Польская сялянская партыя (PSL). Палітычныя партыі цягам гэтага года востра крытыкуюць дзейнасць сваіх апанентаў.